O‘zbekiston uch oyda “Yoshlar daftari”ga kiritilgan 271 mingdan ortiq yigit-qizning bandligi ta’minlandi va bu hali hammasi emas

O‘zbekistonda yoshlar bandligini ta’minlash yo‘lida qanday chora-tadbirlar amalga oshirilmoqda? Ularning bo‘sh vaqtini mazmunli o‘tkazish uchun qanday tadbirlar tashkil etilmoqda? Ijtimoiy ko‘makka muhtoj yoshlarga qanday yordam ko‘rsatilmoqda? Yoshlar ishlari agentligi matbuot xizmati bilan hamkorlikda tayyorlangan quyidagi materialda ushbu savollarga bir qadar javob topish mumkin.

“Yoshlar daftari”

Yoshlar bilan ishlashdagi yangicha tizim — “Yoshlar daftari”ni yo‘lga qo‘yish maqsadida Yoshlar ishlari agentligi hamda mas’ul vazirlik va idoralar bilan birgalikda O‘zbekiston bo‘yicha 8 714 ta mahallada 18—30 yosh oralig‘idagi 6 484 806 nafar yoshlarning 5 451 442 nafari (84 foizi) bilan birma-bir muloqot o‘tkazildi. Muloqotlar natijasida 672 970 nafar (ijtimoiy himoyaga, iqtisodiy va psixologik qo‘llab-quvvatlashga muhtoj, ishsiz) yoshlar “Yoshlar daftari”ga kiritildi.

“Yoshlar daftari”ga kiritilganlarning muammolari tahlil qilinganda, 293 956 nafari ishlash, 108 367 nafari tadbirkorlik faoliyatini boshlash, 75 113 nafari tadbirkorlarga biriktirish, 75 850 nafari kasb-hunarga o‘qish, 84 209 nafari ijtimoiy, iqtisodiy va psixologik yordamga muhtoj, 35 475 nafari “Ustoz-shogird” an’anasi doirasida usta-hunarmandlarga biriktirish istagini bildirgan.

2021-yil 1-aprel kuniga qadar, “Yoshlar daftari”ga kiritilgan 271 495 nafar yoshlarning bandligi ta’minlandi. Shundan:

• 69 626 nafar yoshlar doimiy va jamoat ishlariga joylashtirildi;
• 33 348 nafar yoshlarning tadbirkorlik faoliyati uchun 813,72 milliard so‘m kreditlar ajratildi hamda 32 520 ta ish o‘rni tashkil etildi;
• 163 176 nafar yoshlarga 45 329 gektar yer maydonlari ajratildi;
• 5 345 nafar yoshlarga subsidiya ajratish va tashkilllashtirilgan mehnat migratsiyasi orqali bandligiga ko‘maklashildi.

Bundan tashqari, 62 441 nafar yoshlar kasb-hunar va tadbirkorlikka o‘qitildi hamda 27 236 nafar yoshlar “1+1” loyihasi asosida tadbirkor va usta-hunarmandlarga biriktirildi.

Besh muhim tashabbus

Besh muhim tashabbus doirasida 9 240 ta musiqa va san’at, 67 981 ta sport inventar va jihozlari, 5 676 ta kompyuter jamlanmalari, 473 727 ta badiiy kitob ta’lim muassasalari, kutubxona va o‘quv markazlariga yetkazib berildi.

Shuningdek, 36 087 ta to‘garakka 873 861 nafar yoshlar jalb etildi. Jumladan,

• madaniyat va san’at yo‘nalishida 8 651 ta to‘garaklar orqali 215 612 nafar,
• sport yo‘nalishida 12 282 ta to‘garaklar orqali 303 140 nafar,
• IT yo‘nalishida 8 005 ta to‘garaklar orqali 166 382 nafar,
• kitobxonlik yo‘nalishida 7 149 ta to‘garaklar orqali 189 671 nafar yoshlar

qamrab olindi.

Ijtimoiy ko‘mak

Oliy ta’lim muassasalarida to‘lov-shartnoma asosida tahsil olayotgan chin yetim, ota-onasi ota-onalik huquqidan mahrum etilgan va Mehribonlik uyida tarbiyalangan talabalar uchun “Yoshlar ta’lim granti” loyihasi doirasida 1570 ta arizalar ichidan eng munosib 208 nafar (38 nafari chin yetim, 5 nafari nogiron, 11 nafari mehribonlik uyi bitiruvchilari, 154 nafar boquvchisini yo‘qotgan) talabalarga 2020—2021-o‘quv yili uchun jami 520,83 million so‘m miqdorda, stipendiyasiz hisoblangan shartnoma mablag‘larining 50 foizgacha qismi beg‘araz qoplab berildi.

Mediasavodxonlik

Yoshlar mediasavodxonligini ta’minlash, ularning jurnalistikaga bo‘lgan qiziqishlarini qondirish maqsadida O‘zbekistonning har bir hududida Yoshlar media markazlari va Yosh jurnalistlar maktablarini ochish rejalashtirilgan bo‘lib, ularning moddiy texnik bazasini shakllantirish uchun Yoshlar ishlari agentligi hisobidan qariyb 2 milliard so‘m mablag‘ ajratilgan.

Bugunga qadar ushbu loyiha doirasida Toshkent, Namangan va Samarqand viloyatlarida media markazlar va yosh jurnalistlar maktablari faoliyati yo‘lga qo‘yildi, ularda 1,2 mingdan ziyod yoshlar ta’lim olmoqda.

“Yoshlar dasturlari”

Yoshlar ishlari agentligi tomonidan 2021-yilda mas’ul vazirlik va idoralar bilan hamkorlikda yoshlar bilan ishlash bo‘yicha yangicha tizimni joriy etishga qaratilgan tuman (shahar)lar kesimida “Yoshlar dasturlari” ijrosi tizimli yo‘lga qo‘yildi. Dasturlar ijrosi bo‘yicha 2021-yil birinchi chorak uchun aniq reja ko‘rsatkichlari belgilab olinib, 8 131 ta banddan iborat “Yoshlar dasturlari” tasdiqlandi va ijroga qaratildi.

Ushbu dasturlar doirasida bugungi kunga qadar yoshlarning bo‘sh vaqtini mazmunli tashkil etish bo‘yicha madaniyat, san’at, sport, axborot texnologiyalari va kitobxonlik bo‘yicha alohida kalendar-rejalar asosida tadbir va loyihalar o‘tkazilishi “mahallabay” yo‘lga qo‘yildi.

Bunda faollar zali mavjud bo‘lgan 5 141 ta maktabda, faollar zali mavjud bo‘lmagan 4 867 ta maktabda, shuningdek, sport zali mavjud bo‘lgan 7 700 ta maktabda, sport zali mavjud bo‘lmagan 2 308 ta maktabda alohida tadbir va loyihalar o‘tkazildi va o‘tkazilmoqda.

Shuningdek, maktablarning sport va faollar zallarida har kuni soat 16:00 dan 22:00 gacha to‘garak va mashg‘ulotlar o‘tkazilishi yo‘lga qo‘yilib, kuniga o‘rtacha 195 ming nafar yoshlarning bo‘sh vaqti mazmunli tashkil etilmoqda.

“Yuqorida qayd etilgan har bitta vazifani yoshlar manfaatidan kelib chiqib, mutasaddi vazirlik va idoralar, hokimliklar, sektor rahbarlari bilan hamkorlikda tizimli va sifatli amalga oshirilishi ta’minlanadi”, — deyiladi Yoshlar ishlari agentligi axborotida.