Qashqadaryoda yer maydonlarini noqonuniy ravishda sotmoqchi bo‘lgan fuqarolar qo‘lga olindi, deya “Daryo”ga xabar qilmoqda DXX.
Qayd etilishicha, DXX Qashqadaryo viloyati boshqarmasi va Departamentning hududiy boshqarmasi hamkorligida tezkor tadbir o‘tkazilgan. Unda Qarshi tumanida yashovchi fuqaro dehqon xo‘jaligi tashkil etish uchun 2008-yil tuman hokimi qarori bilan uning onasi nomiga ajratib berilgan 33 sotix yer maydonini tasarruf etish huquqiga ega bo‘lmasa-da, 40 million so‘mga sotgan vaqtida ashyoviy dalillar bilan ushlandi.
Qashqadaryoda kuzatilgan yana bir holatda esa Nishon tumani “Yer resurslari va davlat kadastri” mutaxassisi tadbirkorlik bilan shug‘ullanmoqchi bo‘lgan fuqaroga baliqchilik xo‘jaligi tashkil qilishi uchun 8 gektar yer ajratilishida va bu borada tuman hokimining tegishli qarori chiqarilishida yordam berishini aytib, xizmati evaziga undan 1000 AQSh dollari talab qiladi.
O‘tkazilgan tezkor tadbir jarayonida kadastr xodimi 900 AQSh dollari olgan vaqtida ushlandi.
Hozirda mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Bundan avval Toshkent viloyatida qariyb 160 gektar yer noqonuniy o‘zlashtirib olingani aniqlangani, Andijonda 100 gektar yerni 128 ming dollarga sotishga uringan hokimiyat xodimi qo‘lga olingani hamda Samarqandda tanishini 600 dollar evaziga tez tibbiy yordamga ishga kiritib qo‘ymoqchi bo‘lgan hamshira ushlangani haqida xabar berilgandi.
Izoh (0)