O‘zbekiston va Ukraina to‘g‘ridan to‘g‘ri parvozlarni 2021-yil may oyida tiklaydi. Bu haqda transport vaziri, “O‘zbekiston havo yo‘llari” aviakompaniyasi raisi Ilhom Mahkamov 28-aprel kuni bo‘lib o‘tgan matbuot anjumanida ma’lum qildi, deb xabar beradi “Gazeta.uz”.
“Kiyev bilan muzokaralar olib borilmoqda, bizda aniq reja bor. Pandemiya tufayli hech narsa keskin o‘zgarmasa, biz may oyidan boshlab parvozlarni haftasiga ikki yoki uch marta amalga oshirishni rejalashtirmoqdamiz. Hozircha ular bizga UIA (Ukraina xalqaro aviakompaniyasi) va SkyUp aviakompaniyalarini taklif qilmoqda”, — dedi Transport vazirligi rahbari.
Bundan tashqari, may oyidan boshlab “O‘zbekiston havo yo‘llari” yangi biznes-modelga o‘tish doirasida Parij, Rim, Milan, Amritsar, Mumbay, Bangkok, Tokio, Kuala-Lumpur va Jakartaga amalga oshiriladigan 9 ta rentabelsiz reysni bekor qilishni rejalashtirmoqda. Bu esa aviakompaniyaning 12,3 million dollarlik xarajatlarini tejashga imkon beradi. Vazirning so‘zlariga ko‘ra, ushbu yo‘nalishlar ko‘p yillar davomida past rentabelli bo‘lib kelgan va aviakompaniyaning moliyaviy holatiga salbiy ta’sir ko‘rsatgan.
“Buni (bekor qilingan reyslarni — tahr.) ham pandemiya, ham aviakompaniyaning yangi strategiyasi bilan bog‘lash mumkin. Agar ushbu mintaqalarga ehtiyoj sezilsa, biz har doim charter reyslarini yo‘lga qo‘yish va u yerdan odamlarni olib kelish imkoniyatiga egamiz. Aslida bu tajriba hamma joyda qo‘llaniladi”, — dedi Ilhom Mahkamov.
“Agar odatdagi muntazam reyslarga o‘tish maqsadga muvofiq bo‘lsa, buning uchun har doim ham imkoniyat bor”, — deya qo‘shimcha qildi u.
Eslatib o‘tamiz, 2015-yilda uzilib qolgan O‘zbekiston va Ukraina o‘rtasida to‘g‘ridan to‘g‘ri doimiy parvozlarni tiklash masalasi uzoq vaqtdan beri muhokama qilib kelinmoqda. 2020-yilning iyun oyida Ukrainaning SkyUp Airlines loukosteri O‘zbekistonga parvozlarni amalga oshirish uchun ariza bergan. Oktabr oyida esa ushbu aviakompaniya Toshkent va Kiyev o‘rtasida muntazam aviaqatnovlarni yo‘lga qo‘yishni rejalashtirayotgani xabar qilindi. Bu parvozlarning narxi 300 dollarni tashkil qilishi mumkinligi ma’lum qilingan.
Shuningdek, “Ukraina xalqaro avialiniyalari” aviakompaniyasi Toshkent va Kiyev o‘rtasida reyslarni tiklashni rejalashtirayotgani haqida xabar berilgandi.
Izoh (0)