Қашқадарё вилояти ҳокими Зоир Мирзаевга биринчи ўринбосар тайинланди. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилди.
Таъкидланишича, 28 апрель куни вилоят ҳокимига биринчи ўринбосар тайинланиши баробарида, ҳокимликнинг ташкилий-назорат гуруҳи раҳбари ҳам тайинланган.
Зоир Мирзаевнинг молия-иқтисодиёт ва камбағалликни қисқартириш масалалари бўйича биринчи ўринбосари — вилоят Иқтисодий тараққиёт ва камбағалликни қисқартириш бош бошқармаси бошлиғи лавозимига Нодир Эркаев тайинланган бўлса, Султонмурод Донаев ҳокимликнинг ташкилий-назорат гуруҳи раҳбари лавозимини эгаллаган.
Маълум бўлишича, Нодир Эркаев 1971 йил Чироқчи туманида туғилган бўлиб, 2017—2018 йилларда вилоят давлат солиқ бошқармаси бошлиғи ўринбосари лавозимида ишлаган. Тайинловга қадар эса Тошкент шаҳар давлат солиқ бошқармаси бошлиғининг биринчи ўринбосари вазифасида ишлаб келаётган бўлган.
Султонмурод Донаев эса 1983 йил Косон туманида туғилган бўлиб, лавозимга қадар Косон тумани ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — иқтисодий тараққиёт ва камбағалликни қисқартириш бўлими бошлиғи вазифасида ишлаб келаётган эди.
Эслатиб ўтамиз, Қашқадарё ҳокимининг собиқ биринчи ўринбосари Ўткир Бўтаев Президент Шавкат Мирзиёев раислигида 2021 йилнинг 8 апрель куни тадбиркорликни ривожлантириш ва 2021 йилда аҳоли бандлигини таъминлаш дастури ижросига бағишланган видеоселектор йиғилишида ишдан олинганди. Шундан сўнг вилоят ҳокимлигининг ташкилий назорат гуруҳи раҳбари Қаҳрамон Нормуҳаммедов ҳам лавозимини тарк этиб, Қашқадарё вилоят Экология ва атроф-муҳитни муҳофаза қилиш бошқармаси бошлиғи лавозимини эгаллаганди.
Изоҳ (0)