O‘zbekistonga 2021-yilda 1,7 million xorijlik hamda 7,5 million mahalliy turistlarni jalb etish rejalashtirilmoqda. Bosh vazir o‘rinbosari — turizm va sport vaziri Aziz Abduhakimov “Ziyorat turizmini rivojlantirishning dolzarb masalalari” mavzusida o‘tkazilgan xalqaro davra suhbatida bu kabi vazifa Prezident tomonidan qo‘yilganini ma’lum qildi.
Ta’kidlanishicha, turizm xizmatlari eksportini 370 million dollarga yetkazish vazifasi topshirilgan.
“Qayd etish kerakki, bu borada eng katta manba, avvalo, ziyorat turizmidir. Yurtimizda islom diniga oid 784 ziyoratgoh, nasroniylik diniga oid 19 hamda buddaviylikka oid 8 madaniy meros obyekti mavjud. Bu imkoniyatdan foydalanib, joriy yilda 700 ming ziyoratchini jalb qilish va 130 million dollarlik xizmatlar eksportini ta’minlash mumkin”, — deydi Aziz Abduhakimov.
Shuningdek, davra suhbati ishtirokchilarida 2021-yilda Imom Buxoriy xalqaro ilmiy-tadqiqot markazi tomonidan tashkil etiladigan tadbirlar, Mir Arab madrasasi tashkil etilganining 500-yilligiga bag‘ishlangan xalqaro konferensiyaga tayyorgarlik ishlari, Termiziy ulamolarning islom tamadduni va jahon sivilizatsiyasiga qo‘shgan hissasiga oid anjumanga tayyorgarlik ishlari katta qiziqish uyg‘otgan.
Bundan tashqari, xalqaro forum doirasida Fransiya, Malayziya, Rossiya, Ozarbayjon kabi xorijiy mamlakatlar mutaxassislari ham so‘zga chiqib, xorij tajribasi hamda O‘zbekistonda ziyorat turizmini rivojlantirishga oid fikrlarini bayon etgan.
Avvalroq 2021—2022-yillarda Samarqandda turizm qishlog‘i va mahallalari soni beshtaga ko‘payishi, Shavkat Mirziyoyev kun-u tun ishlaydigan savdo va xizmatlar uchun maxsus ko‘chalar tashkil etishni ma’qullagani to‘g‘risida xabar berilgandi.
Izoh (0)