Ўзбекистонга 2021 йилда 1,7 миллион хорижлик ҳамда 7,5 миллион маҳаллий туристларни жалб этиш режалаштирилмоқда. Бош вазир ўринбосари — туризм ва спорт вазири Азиз Абдуҳакимов «Зиёрат туризмини ривожлантиришнинг долзарб масалалари» мавзусида ўтказилган халқаро давра суҳбатида бу каби вазифа Президент томонидан қўйилганини маълум қилди.
Таъкидланишича, туризм хизматлари экспортини 370 миллион долларга етказиш вазифаси топширилган.
«Қайд этиш керакки, бу борада энг катта манба, аввало, зиёрат туризмидир. Юртимизда ислом динига оид 784 зиёратгоҳ, насронийлик динига оид 19 ҳамда буддавийликка оид 8 маданий мерос объекти мавжуд. Бу имкониятдан фойдаланиб, жорий йилда 700 минг зиёратчини жалб қилиш ва 130 миллион долларлик хизматлар экспортини таъминлаш мумкин», — дейди Азиз Абдуҳакимов.
Шунингдек, давра суҳбати иштирокчиларида 2021 йилда Имом Бухорий халқаро илмий-тадқиқот маркази томонидан ташкил этиладиган тадбирлар, Мир Араб мадрасаси ташкил этилганининг 500 йиллигига бағишланган халқаро конференцияга тайёргарлик ишлари, Термизий уламоларнинг ислом тамаддуни ва жаҳон цивилизациясига қўшган ҳиссасига оид анжуманга тайёргарлик ишлари катта қизиқиш уйғотган.
Бундан ташқари, халқаро форум доирасида Франция, Малайзия, Россия, Озарбайжон каби хорижий мамлакатлар мутахассислари ҳам сўзга чиқиб, хориж тажрибаси ҳамда Ўзбекистонда зиёрат туризмини ривожлантиришга оид фикрларини баён этган.
Аввалроқ 2021—2022 йилларда Самарқандда туризм қишлоғи ва маҳаллалари сони бештага кўпайиши, Шавкат Мирзиёев куну тун ишлайдиган савдо ва хизматлар учун махсус кўчалар ташкил этишни маъқуллагани тўғрисида хабар берилганди.
Изоҳ (0)