O‘zbekistonda kun-u tun ishlaydigan savdo ko‘chalari va xizmat ko‘rsatish markazlari yaratilishi mumkin. Bu haqda Prezident Shavkat Mirziyoyev raisligida 22-aprel kuni hududlarda xizmat ko‘rsatish sohasi yo‘nalishlarini rivojlantirish masalalari bo‘yicha videoselektor yig‘ilishida aytib o‘tilgan.
Foto: Prezident matbuot xizmati
Yig‘ilishda Prezident har bir loyiha ijrosini nazoratga olib, tadbirkorlarga ko‘maklashish, shu bilan birga, yangi loyihalarni shakllantirib borish yuzasidan ko‘rsatmalar berdi.
Qayd etilishicha, O‘zbekistondagi 28 ta shahar hamda aholisi 150 mingdan ko‘p bo‘lgan tuman markazlarida savdo va xizmatlar uchun maxsus ko‘chalar tashkil etilishi belgilangan. Ularda 100 mingta tadbirkorlik subyektlarini joylashtirish imkoni mavjud.
“Xizmat ko‘rsatishda eng muhim masala – bu manzilni to‘g‘ri tanlash. Shu bois Qurilish vazirligiga viloyat hokimlari bilan birga, savdo va xizmat ko‘rsatishga ixtisoslashgan ko‘chalar hamda markazlarning joyini tanlab, loyihasini ishlab chiqish, lotlarga bo‘lib, tanlov asosida savdoga chiqarish topshirildi”, — deyiladi xabarda.
Xavfsizlik choralarini ko‘rib, ushbu savdo ko‘chalari va xizmat ko‘rsatish obyektlarining kun-u tun ishlashiga ruxsat berilishi ham mumkin.
Shuningdek, Milliy bank tomonidan 28 ta yirik va o‘rta shaharlarda turizm, transport, tibbiyot, ta’lim xizmatlari hamda yirik savdo komplekslari tashkil etish uchun qo‘shimcha 200 million dollar mablag‘ jalb qilinadi.
Umuman aytganda, budjetdan va Milliy bank tomonidan xizmat ko‘rsatish sohasiga jami 500 million dollar yoki 5,5 trillion so‘m yo‘naltiriladi.
Eslatib o‘tamiz, 2019-yilning iyulida “Tungi vaqtda faoliyat yurituvchi umumiy ovqatlanish korxonalari va ko‘ngilochar obyektlarda jamoat xavfsizligini ta’minlashga doir qo‘shimcha chora-tadbirlar to‘g‘risi”dagi hukumat qarori qabul qilingan. Unga ko‘ra, O‘zbekistonda belgilangan talablarni bajargan kafelarning tun-u kun ishlashiga ruxsat berilgan.
