27 апрель куни Россия мудофаа вазири, армия генерали Сергей Шойгу бошчилигидаги делегация Бухорога келди, деб хабар беради вилоят ҳокимлиги матбуот хизмати. Олий мартабали меҳмонни Ўзбекистон мудофаа вазири, генерал-лейтенант Баҳодир Қурбонов, вилоят ҳокими Ботир Зарипов ва бошқа мутасаддилар кутиб олган.
Ташриф доирасида делегация аъзолари Бухоронинг диққатга сазовор жойлари билан танишган. Жумладан, меҳмонлар дастлаб «Ситораи Моҳи хосса» мажмуасини бориб кўрган. Шунингдек, меҳмонлар Бухоронинг марказий майдонларидан бири саналган Кўкалдош, Девонбеги мадрасалари ҳамда Девонбеги хонақоҳи биноларидан ташкил топган Лаби Ҳовуз меъморий ансамбли билан танишган.
Маълум қилинишича, икки давлат мудофаа вазирлари Бухорода халқаро ва минтақавий хавфсизлик муаммоларини, икки томонлама ҳарбий ва ҳарбий-техник ҳамкорликнинг долзарб масалаларини муҳокама қилган.
Шунингдек, дастурдан икки мамлакат мудофаа идораларининг раҳбарлари иштирокида йиғилиш ўтказилиши режалаштирилган. Йиғилиш давомида бир қатор масалалар муҳокама қилиниши кўзда тутилмоқда.
Эслатиб ўтамиз, Россия мудофаа вазири Сергей Шойгу Ўзбекистонга охирги марта 2018 йилнинг майида келган эди. Ўшанда Россия мудофаа вазири Қуролли Кучлар академияси билан танишган, ҳукумат даражасидаги бир қанча учрашувларни ўтказган эди.
Изоҳ (0)