Parijda “neftlar jangi”. Hammasi “PSJ”—“Manchester Siti” uchrashuvi haqida

Yevropa Chempionlar Ligasi yarim finali dastlabki bahsida “PSJ” va “Manchester Siti” jamoalari o‘zaro to‘qnash keladi. Gvardiola qo‘l ostida ilk bor yarim finalga chiqqan “shaharliklar” ketma-ket ikkinchi marta ushbu bosqichga yetib kelgan va o‘ta mahoratli ijrochilarga ega Parij klubi maydonida mehmon bo‘ladi.

“PSJ”

Parijliklar guruh bosqichida “Manchester Yunayted”, “Leypsig” va “Istanbul Bashakshehir”ga qarshi bahs olib bordi. Omadsiz startga qaramay, “PSJ” yakunda birinchi o‘rinni qo‘lga kirita oldi. 1/8 finalda Parij jamoasi “Barselona” to‘sig‘idan muvaffaqiyatli o‘tdi. Keyingi qur’a ham jamoaga qiyin raqibni ro‘baro‘ qildi — “Bavariya”. Safarda 3:2 hisobini qayd etgan parijliklar o‘z maydonida minimal hisobda yutqazdi va ikki o‘yin natijasiga ko‘ra yarim finalga chiqdi.

Markinyos va Kilian Mbappe “Manchester Siti”ga qarshi o‘yinda ishtirok eta oladi. “PSJ” joriy mavsumda kadrlar muammosiga tez-tez duch kelmoqda, biroq “Siti”ga qarshi o‘yinga qadar ular bartaraf etilgan. Birinchidan, jamoa sardori va markaziy himoyachi Markinyos safga qaytdi. Braziliyalik futbolchi “Bavariya”ga qarshi kechgan so‘nggi o‘yinda jarohat olgan va shundan buyon maydonga tushmayotgandi. Uning safga qaytishi “PSJ” uchun ulkan yutuq, biroq sardor qanday formada ekani hozircha noma’lum.

Liga 1 doirasidagi “Mets”ga qarshi o‘yinda Kilian Mbappe maydonni muddatidan avval tark etdi. Yulduzning oqsoqlanishi ko‘plab muxlislarni xavotirga qo‘ydi, lekin uning jarohati jiddiy bo‘lib chiqmadi. Bu ikki futbolchining yo‘qotilishi “PSJ” uchun ulkan falokat bo‘lishi aniq edi. Kilian pley-off bosqichida oltita gol urdi. Usiz parijliklarning hujum chizig‘i ancha qiynalib qoladi, garchi tarkibda Neymar, Ikardi va Moyze Kin kabi yulduzlar bo‘lsa ham.

Nihoyat, “PSJ”da ishonchli darvozabon bor. Darvozabon chizig‘i parijliklar uchun uzoq vaqtdan beri og‘riqli mavzu edi. Navasdan avvalgi darvozabonlarni yomon deb bo‘lmaydi, biroq ular “devor” bo‘lib bera olmadi. Keylor esa “PSJ”ning haqiqiy “devor”iga aylandi.

“Barselona”ga qarshi kechgan ikki o‘yinda Navas 12 ta seyv ijro etdi, “Bavariya” bilan esa — 14 ta. Chempionlar Ligasida darvozaga yo‘llangan zarbalarni qaytarish ko‘rsatkichi Navasda 85,2 foizga teng. Albatta, “Real” bilan ketma-ket uchta YChL bosh sovrinini qo‘lga kiritgan posbondan yana nimani kutish mumkin?

Bu mavsum Parijdagi devorlar yordam bera olmayapti. O‘z maydoningda harakat qilish — ustunlik, biroq “PSJ” YChL joriy mavsumida “Park de Prens”dagi o‘yinlarning barchasida ham muvaffaqiyatli ishtirok etolmayapti. Chempionlar Ligasi 2020/21-yilgi mavsumdagi birinchi uy o‘yinidayoq “PSJ” “Manchester Yunayted”ga yutqazib qo‘ydi (1:2). Shundan keyin jamoa uyida qoniqarli natijalar qayd etdi, biroq so‘nggi ikkita o‘yin haqida bunday deb bo‘lmaydi. “Barselona” bilan durang o‘ynagan “PSJ” chorak finalda “Bavariya”ga yutqazdi. Ushbu statistikani to‘g‘rilash vaqti keldi.

“Manchester Siti”

“Manchester Siti” uchun guruh bosqichi raqiblar borasida omadli keldi. “Portu”, “Olimpiakos” va “Marsel” — ularni Pep Gvardiola jamoasi uchun jiddiy raqib deb bo‘lmaydi. “Siti” ishonchli tarzda birinchi o‘rinni oldi. Nimchorak va chorak finallarda jamoaga “Borussiya”lar duch keldi. Avvalgida Myunxengladbax klubi taslim etilgan bo‘lsa, keyingi bosqichda dortmundliklar mag‘lub qilindi.

Pep Gvardiolaning yashirin quroli — hujum. “PSJ”ning asosiy vazifalaridan biri “Manchester Siti”ning hujum chizig‘ida kim to‘p surishini taxmin qilish, biroq “shaharliklar” murabbiyining rejasini bashorat qilishning deyarli iloji yo‘q. Gvardiola nimani ma’qul ko‘radi: hujumchi bilan o‘ynashnimi yoki buning aksini? Ayrim vaqtlarda “Manchester Siti”ga klassik hujumchi yetishmayotgandek bo‘ladi, biroq jamoa katta o‘yinlarda forvardsiz ham yomon harakat qilmaydi. Ha, Gvardiola tasarrufida Gabi Jezus va Serxio Aguero bor, biroq ular muntazam asosiy tarkibda maydonga tushmaydi. Braziliyalik futbolchi YChL joriy mavsumida faqat ikkita o‘yinda asosiy tarkibda maydonga tushdi, Aguero esa bitta. Ammo ularning ikkisi ham o‘z hisobiga gol yozdirib qo‘yishga ulgurgan.

Top-klublarga qarshi bahslarda jamoa yashirin “to‘qqizinchi raqam” bilan o‘ynamoqda, bu ishni Kevin de Bryuyne va Bernardu Silva amalga oshirmoqda, ayrim holatlarda esa Ilkay Gundo‘g‘an. Ilkay ayni vaqtda jamoaning eng yaxshi to‘purari bo‘lib turibdi.

“Manchester Siti” Chempionlar Ligasi joriy mavsumida hali yutqazmadi. Inglizlar bu YChLda faqat “Portu” bilan durang o‘ynadi va qolgan barcha bahsni o‘z foydasiga hal qildi.

Shu bilan birga Gvardiolaning Maurisio Pochettinoga qarshi statistikasini ham unutmaslik zarur. Taqdir ularni Ispaniya va Angliyada o‘zaro ro‘baro‘ keltirgan. Ularning keskin munosabati maydon tashqarisiga ham chiqib ketgan, axir biri “Barselona”ga ustozlik qilgan bo‘lsa, boshqasi “Espanyol”da ishlagan. Hech qaysi murabbiy Pochettino bilan Gvardiolachalik ko‘p to‘qnash kelmagan. Pepning unga qarshi statistikasi: 10 g‘alaba, 5 durang va 3 mag‘lubiyat. Gvardiola jamoasi 18 o‘yinda 34 ta gol urgan va bor-yo‘g‘i 18 to‘p o‘tkazib yuborgan.

Statistika va faktlar

• Jamoalar rasmiy o‘yinlarda o‘zaro uch marta to‘qnash kelgan: “Siti”da bitta g‘alaba va ikkita durang;
• Qarama-qarshilikning eng yaxshi to‘purari — Kevin de Bryuyne (2 ta gol);
• Bu “Manchester Siti” uchun Yervokuboklar doirasidagi to‘rtinchi va 2015/16-yilgi mavsumdan keyingi ilk yarim final. Finalga qadar “Siti” 1970-yildagina yetib borgan va bu Kubok egalari Kubogida qayd etilgan;
• “PSJ” finalga chiqa olsa ketma-ket ikkita mavsumda bu ishni uddalagan 8 jamoa qatoriga qo‘shiladi. Ular ichida faqat “Atletiko” va “Valensiya” ikki finalni ham boy bergan;
• Bu Gvardiolaning murabbiylik faoliyatidagi 8-yarim final bo‘ladi. Kataloniyalik mutaxassis bu borada Joze Mourinyo bilan birgalikda rekordchi hisoblanadi.

Murabbiylar fikri

“PSJ” “Tottenhem”dan butkul boshqacha. Hozir “Siti” boshqacha va men “PSJ”da ishlayapman. “Manchester Siti” — eng yaxshi murabbiyga ega dunyoning eng kuchli klublaridan biri. Ko‘ramiz, “Bavariya”ga qarshi bahsdan ko‘ra qiyinroq bo‘larmikan...

Maurisio Pochettino, “PSJ” bosh murabbiyi

Men yutishni istamayman, finalga chiqishni xohlamayman. Shunchaki jamoam o‘z futbolini namoyish qilishini orzu qilaman. Ikki o‘yinda ham qiyin bo‘lishini bilamiz, ularda imkoniyatlar bo‘ladi. Ularning o‘yinchilari qanday mahoratga ega ekani barchaga ma’lum. YChL yarim finalidan yana nima kutish mumkin?

APL — eng muhim musobaqa, YChL esa — eng chiroyli.

Pep Gvardiola, “Manchester Siti” bosh murabbiyi

PSJ va “Manchester Siti” jamoalari o‘rtasidagi uchrashuv 28-apreldan 29-aprelga o‘tar kechasi 00:00 da boshlanadi.