2021-yilning 21-may — 1-iyun kunlari Hindistonning Nyu-Deli shahrida o‘tkazilishi rejalashtirilgan boks bo‘yicha kattalar o‘rtasidagi Osiyo chempionati BAAga ko‘chirildi. Bu haqda O‘zbekiston boks federatsiyasi matbuot xizmati ma’lum qildi.
Hindistonda koronavirus bilan bog‘liq yuzaga kelgan og‘ir vaziyat sabab Osiyo boks konfederatsiyasi shu qarorga kelgan. Endilikda ushbu musobaqa BAAning Dubay shahrida bo‘lib o‘tadi.
Ma’lumot uchun, Osiyo chempionati erkaklar o‘rtasida 10 ta, ayollar o‘rtasida 10 ta vazn toifasi bo‘yicha tashkil etiladi.
Eslatib o‘tamiz, 2019-yilgi Osiyo chempionati Tailandda o‘tkazilgan bo‘lsa, 2017-yilgi musobaqaga O‘zbekiston mezbonlik qilgandi. Avvalgi har ikki musobaqada O‘zbekiston terma jamoasi umumjamoa hisobida birinchi o‘rinni qo‘lga kiritgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)