Парижда «нефтлар жанги». Ҳаммаси «ПСЖ»—«Манчестер Сити» учрашуви ҳақида

Европа Чемпионлар Лигаси ярим финали дастлабки баҳсида «ПСЖ» ва «Манчестер Сити» жамоалари ўзаро тўқнаш келади. Гвардиола қўл остида илк бор ярим финалга чиққан «шаҳарликлар» кетма-кет иккинчи марта ушбу босқичга етиб келган ва ўта маҳоратли ижрочиларга эга Париж клуби майдонида меҳмон бўлади.

«ПСЖ»

Парижликлар гуруҳ босқичида «Манчестер Юнайтед», «Лейпциг» ва «Истанбул Башакшеҳир»га қарши баҳс олиб борди. Омадсиз стартга қарамай, «ПСЖ» якунда биринчи ўринни қўлга кирита олди. 1/8 финалда Париж жамоаси «Барселона» тўсиғидан муваффақиятли ўтди. Кейинги қуръа ҳам жамоага қийин рақибни рўбарў қилди — «Бавария». Сафарда 3:2 ҳисобини қайд этган парижликлар ўз майдонида минимал ҳисобда ютқазди ва икки ўйин натижасига кўра ярим финалга чиқди.

Маркиньос ва Килиан Мбаппе «Манчестер Сити»га қарши ўйинда иштирок эта олади. «ПСЖ» жорий мавсумда кадрлар муаммосига тез-тез дуч келмоқда, бироқ «Сити»га қарши ўйинга қадар улар бартараф этилган. Биринчидан, жамоа сардори ва марказий ҳимоячи Маркиньос сафга қайтди. Бразилиялик футболчи «Бавария»га қарши кечган сўнгги ўйинда жароҳат олган ва шундан буён майдонга тушмаётганди. Унинг сафга қайтиши «ПСЖ» учун улкан ютуқ, бироқ сардор қандай формада экани ҳозирча номаълум.

Лига 1 доирасидаги «Мец»га қарши ўйинда Килиан Мбаппе майдонни муддатидан аввал тарк этди. Юлдузнинг оқсоқланиши кўплаб мухлисларни хавотирга қўйди, лекин унинг жароҳати жиддий бўлиб чиқмади. Бу икки футболчининг йўқотилиши «ПСЖ» учун улкан фалокат бўлиши аниқ эди. Килиан плей-офф босқичида олтита гол урди. Усиз парижликларнинг ҳужум чизиғи анча қийналиб қолади, гарчи таркибда Неймар, Икарди ва Мойзе Кин каби юлдузлар бўлса ҳам.

Ниҳоят, «ПСЖ»да ишончли дарвозабон бор. Дарвозабон чизиғи парижликлар учун узоқ вақтдан бери оғриқли мавзу эди. Навасдан аввалги дарвозабонларни ёмон деб бўлмайди, бироқ улар «девор» бўлиб бера олмади. Кейлор эса «ПСЖ»нинг ҳақиқий «девор»ига айланди.

«Барселона»га қарши кечган икки ўйинда Навас 12 та сейв ижро этди, «Бавария» билан эса — 14 та. Чемпионлар Лигасида дарвозага йўлланган зарбаларни қайтариш кўрсаткичи Навасда 85,2 фоизга тенг. Албатта, «Реал» билан кетма-кет учта ЕЧЛ бош совринини қўлга киритган посбондан яна нимани кутиш мумкин?

Бу мавсум Париждаги деворлар ёрдам бера олмаяпти. Ўз майдонингда ҳаракат қилиш — устунлик, бироқ «ПСЖ» ЕЧЛ жорий мавсумида «Парк де Пренс»даги ўйинларнинг барчасида ҳам муваффақиятли иштирок этолмаяпти. Чемпионлар Лигаси 2020/21 йилги мавсумдаги биринчи уй ўйинидаёқ «ПСЖ» «Манчестер Юнайтед»га ютқазиб қўйди (1:2). Шундан кейин жамоа уйида қониқарли натижалар қайд этди, бироқ сўнгги иккита ўйин ҳақида бундай деб бўлмайди. «Барселона» билан дуранг ўйнаган «ПСЖ» чорак финалда «Бавария»га ютқазди. Ушбу статистикани тўғрилаш вақти келди.

«Манчестер Сити»

«Манчестер Сити» учун гуруҳ босқичи рақиблар борасида омадли келди. «Порту», «Олимпиакос» ва «Марсель» — уларни Пеп Гвардиола жамоаси учун жиддий рақиб деб бўлмайди. «Сити» ишончли тарзда биринчи ўринни олди. Нимчорак ва чорак финалларда жамоага «Боруссия»лар дуч келди. Аввалгида Мюнхенгладбах клуби таслим этилган бўлса, кейинги босқичда дортмундликлар мағлуб қилинди.

Пеп Гвардиоланинг яширин қуроли — ҳужум. «ПСЖ»нинг асосий вазифаларидан бири «Манчестер Сити»нинг ҳужум чизиғида ким тўп суришини тахмин қилиш, бироқ «шаҳарликлар» мураббийининг режасини башорат қилишнинг деярли иложи йўқ. Гвардиола нимани маъқул кўради: ҳужумчи билан ўйнашними ёки бунинг аксини? Айрим вақтларда «Манчестер Сити»га классик ҳужумчи етишмаётгандек бўлади, бироқ жамоа катта ўйинларда форвардсиз ҳам ёмон ҳаракат қилмайди. Ҳа, Гвардиола тасарруфида Габи Жезус ва Серхио Агуэро бор, бироқ улар мунтазам асосий таркибда майдонга тушмайди. Бразилиялик футболчи ЕЧЛ жорий мавсумида фақат иккита ўйинда асосий таркибда майдонга тушди, Агуэро эса битта. Аммо уларнинг иккиси ҳам ўз ҳисобига гол ёздириб қўйишга улгурган.

Топ-клубларга қарши баҳсларда жамоа яширин «тўққизинчи рақам» билан ўйнамоқда, бу ишни Кевин де Брюйне ва Бернарду Сильва амалга оширмоқда, айрим ҳолатларда эса Илкай Гундўған. Илкай айни вақтда жамоанинг энг яхши тўпурари бўлиб турибди.

«Манчестер Сити» Чемпионлар Лигаси жорий мавсумида ҳали ютқазмади. Инглизлар бу ЕЧЛда фақат «Порту» билан дуранг ўйнади ва қолган барча баҳсни ўз фойдасига ҳал қилди.

Шу билан бирга Гвардиоланинг Маурисио Почеттинога қарши статистикасини ҳам унутмаслик зарур. Тақдир уларни Испания ва Англияда ўзаро рўбарў келтирган. Уларнинг кескин муносабати майдон ташқарисига ҳам чиқиб кетган, ахир бири «Барселона»га устозлик қилган бўлса, бошқаси «Эспаньол»да ишлаган. Ҳеч қайси мураббий Почеттино билан Гвардиолачалик кўп тўқнаш келмаган. Пепнинг унга қарши статистикаси: 10 ғалаба, 5 дуранг ва 3 мағлубият. Гвардиола жамоаси 18 ўйинда 34 та гол урган ва бор-йўғи 18 тўп ўтказиб юборган.

Статистика ва фактлар

• Жамоалар расмий ўйинларда ўзаро уч марта тўқнаш келган: «Сити»да битта ғалаба ва иккита дуранг;
• Қарама-қаршиликнинг энг яхши тўпурари — Кевин де Брюйне (2 та гол);
• Бу «Манчестер Сити» учун Ервокубоклар доирасидаги тўртинчи ва 2015/16 йилги мавсумдан кейинги илк ярим финал. Финалга қадар «Сити» 1970 йилдагина етиб борган ва бу Кубок эгалари Кубогида қайд этилган;
• «ПСЖ» финалга чиқа олса кетма-кет иккита мавсумда бу ишни уддалаган 8 жамоа қаторига қўшилади. Улар ичида фақат «Атлетико» ва «Валенсия» икки финални ҳам бой берган;
• Бу Гвардиоланинг мураббийлик фаолиятидаги 8-ярим финал бўлади. Каталониялик мутахассис бу борада Жозе Моуриньо билан биргаликда рекордчи ҳисобланади.

Мураббийлар фикри

«ПСЖ» «Тоттенҳэм»дан буткул бошқача. Ҳозир «Сити» бошқача ва мен «ПСЖ»да ишлаяпман. «Манчестер Сити» — энг яхши мураббийга эга дунёнинг энг кучли клубларидан бири. Кўрамиз, «Бавария»га қарши баҳсдан кўра қийинроқ бўлармикан...

Маурисио Почеттино, «ПСЖ» бош мураббийи

Мен ютишни истамайман, финалга чиқишни хоҳламайман. Шунчаки жамоам ўз футболини намойиш қилишини орзу қиламан. Икки ўйинда ҳам қийин бўлишини биламиз, уларда имкониятлар бўлади. Уларнинг ўйинчилари қандай маҳоратга эга экани барчага маълум. ЕЧЛ ярим финалидан яна нима кутиш мумкин?

АПЛ — энг муҳим мусобақа, ЕЧЛ эса — энг чиройли.

Пеп Гвардиола, «Манчестер Сити» бош мураббийи

ПСЖ ва «Манчестер Сити» жамоалари ўртасидаги учрашув 28 апрелдан 29 апрелга ўтар кечаси 00:00 да бошланади.