Ижтимоий тармоқларда Сариосиё—Тошкент йўналишида ҳаракатланувчи №681 сонли йўловчи поездида биринчи тиббий ёрдам кўрсатиш учун дори воситалари, аптечка, тиббий билимга эга бирор шахс йўқлиги боис, бир кекса аёлнинг тоби қочиб вафот этганлиги ҳақида хабар тарқалди. Ушбу хабар юзасидан «Ўзтемир йўлйўловчи» изоҳ берди.
Маълум қилинишича, 2021 йилнинг 25 апрель куни №681 сонли Сариосиё—Тошкент йўналишида ҳаракатланувчи йўловчи поезднинг 17-вагони 30-ўриндиғига Сариосиё бекатидан 1961 йил 15 сентябрда таваллуд топган йўловчи Б.Г. қизи ва ўғлининг ҳамроҳлигида Тошкент шаҳрига йўлга чиққан.
Йўловчи Б.Г. вагонга чиқаётган вақтида аҳволи оғир эканлигини инобатга олиб вагон кузатувчилари Салимов Козим, Илҳомов Қодирлар томонидан йўловчига амалий ёрдам берилган ва ҳар бир темир йўл бекатида тиббиёт ходимлари вагонга чақиртирилган. Йўл сафари давомида Б.Г.нинг аҳволи кескин равишда оғирлашиб, Денов, Қумқўрғон, Бойсун, Дарбанд вокзалларида тиббиёт ходимлари томонидан биринчи тиббий ёрдам кўрсатилган.
Қумқўрғон тиббиёт пункти навбатчи фелдшери Менгноров Абдувоҳид соат 18:20 ларда Сариосиё—Тошкент йўловчи поездининг 17-вагонидаги бемор Б.Г.га биринчи тез тиббий ёрдам кўрсатаётган вақтида беморнинг қизи онаси Б.Г.нинг жигар сиррози касаллиги билан оғриганини айтади. Буни у ўз тушунтириш хатида ҳам баён қилган.
Дарбанд вокзали ҳамшираси Нормаматова Наргиза Сариосиё—Тошкент йўловчи поездининг 17-вагонида бемор аёлга биринчи тиббий ёрдам кўрсатиш вақтида беморнинг фарзандларига беморни йўловчи поездидан тушириб олиб қолишни айтган, беморнинг ўғли поезддан тушиб қолишга рози бўлмаган. Беморнинг ўғли буни ўз тушунтириш хатида ҳам баён қилган.
Темир йўл бекатларида биринчи тиббий ёрдам кўрсатилишига қарамасдан, мазкур поезд Оқработ темир йўл бекатига яқинлашаётганида тоби қочган бемор йўловчи оламдан ўтган.
«Бугунги кунда ‘Ўзбекистон темир йўллари’ АЖга қарашли барча поездларда тиббиёт қутилари (аптечкалар), биринчи ёрдам кўрсатиш учун дори-дармонлар билан таъминланган. Бундан ташқари, ҳар бир станцияда тиббиёт хоналари мавжуд, уларда кеча-ю кундуз тиббиёт ходимлари фаолият олиб боради.
Шунингдек, айни кунда йўловчи поездларни техник ва технологик йўлга тайёрлаш корхонасида 100 га яқин тиббиёт қутилари захира қилинган. Улар дори воситалари билан тўлдирилиб, фойдаланиш муддати доимий равишда назорат қилиб борилади.
Шу боис фуқароларимиздан ижтимоий тармоқларда асоссиз маълумотларни тарқатмасликларини сўраб қоламиз», – дейилади компания хабарида.
Бундан аввал Тошкентда ўз жонига қасд қилмоқчи бўлган қиз ўзини поезд остига ташлагани, Тошкент вилоятида Lacetti юк поездига тўқнашиб, ағдарилиб кетгани ҳамда Тошкент метрополитени «3-бекат» таблосида пайдо бўлган уятсиз ёзув юзасидан изоҳ бергани ҳақида хабар берилганди.
Изоҳ (0)