Toshkentdagi “Yalang‘och” va “Salar” temiryo‘l stansiyalari oralig‘ida o‘z joniga qasd qilishga uringan qiz o‘zini poyezd ostiga tashladi. Bu haqda “O‘zbekiston temir yo‘llari” matbuot xizmati xabar berdi.

Ma’lumotlarga ko‘ra, qiz hozirda shifoxonada. Tergov organlari tomonidan mazkur holat bo‘yicha surishtiruv ishlari olib borilmoqda. Xabarda qizning yoshiga aniqlik kiritilmagan.

Shuningdek, ma’lum qilinishicha, hozirda yana boshqa sodir bo‘lgan voqea yuzasidan mutasaddilar tomonidan surishtiruv ishlari olib borilmoqda. 8-fevral kuni Toshkentning Yashnobod tumanida, tartibga solinmaydigan temiryo‘l kesishmalaridan birida teplovoz va Cobalt to‘qnashuvi sodir bo‘lgan. Natijada hech kim jabrlanmagan.

“Bunday holatlarning takrorlanishini hisobga olgan holda, shuni ma’lum qilamizki, tegishli tarkibiy tuzilmalar, tashkilotlar va joylardagi mutasaddilar tomonidan muntazam ravishda temiryo‘l yaqinida istiqomat qiluvchi aholi va transport vositalari egalari bilan temiryo‘lda xavfsizlikka rioya etish to‘g‘risida tushuntirish ishlari olib borilmoqda. Profilaktik suhbatlar, qator uchrashuvlar, mavzu doirasida chora-tadbirlar ishlab chiqilgan bo‘lib, ayniqsa, bu borada maktab o‘quvchilari va o‘smirlar bilan ishlashga alohida e’tibor qaratilmoqda”, — deyiladi xabarda.

Bundan tashqari, xabarda barcha yo‘l harakati ishtirokchilari temiryo‘l kesishmalaridan o‘tish va po‘lat izlarida piyodalar harakati qoidalarining talablariga birdek rioya etishlari shartligini eslatib o‘tgan.

Avvalroq Toshkentda yuk poyezdi 14 yoshli qizni urib yuborgan edi. 8-fevral kuni esa Saida Mirziyoyeva jarohat olgan qizning ota-onasi bilan uchrashgan va jonlantirish bo‘limida bolaning hayoti uchun kurash olib borilayotgan kasalxonaga tashrif buyurgan.