AQShda afroamerikalikning politsiyachi tomonidan o‘ldirilishi oqibatida favqulodda holat joriy etildi

AQShning Shimoliy Karolina shtatidagi Elizabet-Siti shahrida afroamerikalikning politsiyachi tomonidan o‘ldirilgani sababli favqulodda holat e’lon qilindi. Bu haqda shahar ma’muriyatining ma’lumotlariga tayanib “Korrespondent.net” xabar berdi.

Favqulodda holat qancha vaqt davom etishi hozircha noma’lum.

“Jamoat tartibsizliklari paytida fuqarolarni himoya qilish uchun zarur choralarni ta’minlash maqsadida biz 26-aprel kuni mahalliy vaqt bilan soat 08:00 dan boshlab Elizabet-Sitida favqulodda holat e’lon qilish kerak, deb hisoblaymiz”, — deyiladi xabarda.

USA Today nashrining xabar berishicha, voqea 21-aprel kuni sodir bo‘lgan edi. Huquqni muhofaza qilish organlari afroamerikalik Endryu Braunni hibsga olish uchun orderni ko‘rsatgan, lekin ayblanuvchi politsiyaning ko‘rsatmalariga bo‘ysunmagan va yashirinishga uringan. Natijada politsiyachilar qurol ishlatishga majbur bo‘lgan. 7 nafar farzandning otasi boshiga o‘q tegishi oqibatida bir necha daqiqa o‘tgach vafot etgan.

Avvalroq AQShning Ogayo shtati Kolumbus shahrida politsiya xodimi 16 yoshli qora tanli qizni otib o‘ldirdi. Bunga javoban politsiya binosi oldida namoyishchilar to‘planishni boshladi.

Qayd etilishicha, ushbu hodisa, taxminan, qora tanli amerikalik Jorj Floydni bo‘g‘ib o‘ldirgan sobiq politsiyachiga hukm e’lon qilingan vaqtda sodir bo‘lgan. Sud hay’ati Minneapolis shahrining sobiq politsiyachisi Derek Shovinni afroamerikalik Jorj Floydni ehtiyotsizlik orqasida odam o‘ldirishda aybdor deb topdi.  Suddan keyin Shovin Minnesota shtatidagi Ouk-Park-Xayts axloq tuzatish muassasasiga joylashtirildi.

Ma’lumot uchun, AQShning Minnesota shtatidagi Bruklin-Senter shahrida yana bir qora tanli yigit politsiyachilar tomonidan hibsga olinish paytida o‘ldirildi. Shundan so‘ng shaharda norozilik namoyishlari boshlangan. Shuningdek, AQShda politsiyachi shifoxonaga yotqizilgan qora tanli erkakni otib qo‘ygan edi.

Bundan avval 2020-yilning may oyida Minnesota shtatida qora tanli amerikalik Jorj Floyd politsiya tomonidan hibsga olinayotganda politsiyachi uni yerga yotqizib, tizzasi bilan uzoq vaqt bo‘ynini bosib turishi oqibatida o‘lgandi. Buning ortidan mamlakat bo‘ylab huquq-tartibot organlari shafqatsizligi va irqiy tengsizlikka qarshi ommaviy norozilik namoyishlari avj oldi va Black Lives Matter (“Qora tanlilarning hayoti muhim”) harakati paydo bo‘ldi. AQShda ushbu noroziliklar fonida tartibsizliklar boshlangan, politsiya va namoyishchilar o‘rtasida to‘qnashuv ham bo‘lgandi.