АҚШда афроамерикаликнинг полициячи томонидан ўлдирилиши оқибатида фавқулодда ҳолат жорий этилди

АҚШнинг Шимолий Каролина штатидаги Элизабет-Сити шаҳрида афроамерикаликнинг полициячи томонидан ўлдирилгани сабабли фавқулодда ҳолат эълон қилинди. Бу ҳақда шаҳар маъмуриятининг маълумотларига таяниб «Korrespondent.net» хабар берди.

Фавқулодда ҳолат қанча вақт давом этиши ҳозирча номаълум.

«Жамоат тартибсизликлари пайтида фуқароларни ҳимоя қилиш учун зарур чораларни таъминлаш мақсадида биз 26 апрель куни маҳаллий вақт билан соат 08:00 дан бошлаб Элизабет-Ситида фавқулодда ҳолат эълон қилиш керак, деб ҳисоблаймиз», — дейилади хабарда.

USA Today нашрининг хабар беришича, воқеа 21 апрель куни содир бўлган эди. Ҳуқуқни муҳофаза қилиш органлари афроамерикалик Эндрю Браунни ҳибсга олиш учун ордерни кўрсатган, лекин айбланувчи полициянинг кўрсатмаларига бўйсунмаган ва яширинишга уринган. Натижада полициячилар қурол ишлатишга мажбур бўлган. 7 нафар фарзанднинг отаси бошига ўқ тегиши оқибатида бир неча дақиқа ўтгач вафот этган.

Аввалроқ АҚШнинг Огайо штати Колумбус шаҳрида полиция ходими 16 ёшли қора танли қизни отиб ўлдирди. Бунга жавобан полиция биноси олдида намойишчилар тўпланишни бошлади.

Қайд этилишича, ушбу ҳодиса, тахминан, қора танли америкалик Жорж Флойдни бўғиб ўлдирган собиқ полициячига ҳукм эълон қилинган вақтда содир бўлган. Суд ҳайъати Миннеаполис шаҳрининг собиқ полициячиси Дерек Шовинни афроамерикалик Жорж Флойдни эҳтиётсизлик орқасида одам ўлдиришда айбдор деб топди.  Суддан кейин Шовин Миннесота штатидаги Оук-Парк-Хайтс ахлоқ тузатиш муассасасига жойлаштирилди.

Маълумот учун, АҚШнинг Миннесота штатидаги Бруклин-Сентер шаҳрида яна бир қора танли йигит полициячилар томонидан ҳибсга олиниш пайтида ўлдирилди. Шундан сўнг шаҳарда норозилик намойишлари бошланган. Шунингдек, АҚШда полициячи шифохонага ётқизилган қора танли эркакни отиб қўйган эди.

Бундан аввал 2020 йилнинг май ойида Миннесота штатида қора танли америкалик Жорж Флойд полиция томонидан ҳибсга олинаётганда полициячи уни ерга ётқизиб, тиззаси билан узоқ вақт бўйнини босиб туриши оқибатида ўлганди. Бунинг ортидан мамлакат бўйлаб ҳуқуқ-тартибот органлари шафқатсизлиги ва ирқий тенгсизликка қарши оммавий норозилик намойишлари авж олди ва Black Lives Matter («Қора танлиларнинг ҳаёти муҳим») ҳаракати пайдо бўлди. АҚШда ушбу норозиликлар фонида тартибсизликлар бошланган, полиция ва намойишчилар ўртасида тўқнашув ҳам бўлганди.