Britaniya Magnitskiy ishi bo‘yicha 14 nafar rossiyalikka qarshi sanksiyalar kiritdi

Buyuk Britaniya Magnitskiy ishi va Rossiya budjetidan 230 million AQSh dollar o‘g‘irlanishi bilan bog‘liq 14 nafar Rossiya fuqarosiga qarshi sanksiyalar joriy qildi. Bu haqda Buyuk Britaniya tashqi ishlar vazirligi matbuot xizmatiga tayanib, “RBK” xabar berdi.

Cheklovlar ostida, xususan, Ichki ishlar vazirligining Moskva boshqarmasi soliq jinoyatlari departamenti boshlig‘ining sobiq o‘rinbosari Artyom Kuznetsov(uning tashabbusi bilan Magnitskiyga qarshi jinoiy ish qo‘zg‘atilgan); ushbu ish bo‘yicha mas’ul bo‘lgan Ichki ishlar vazirligining sobiq tergovchisi Pavel Karpov; Moskvadagi 28-sonli Federal soliq xizmati inspeksiyasining sobiq rahbari Olga Stepanova va uning sobiq eri Vladlen Stepanov (ular Buyuk Britaniya hukumati tomonidan QQSni byudjetdan qaytarish va  mablag‘larni chet elga olib chiqish sxemasining ishtirokchilaridan biri deb hisoblanadi) bor.

Bundan tashqari, sanksiyalar ro‘yxatiga Moskva prokuraturasi tergovchisi Stanislav Gordiyevskiy, Moskvadagi 25-sonli Federal soliq xizmati inspeksiyasi boshlig‘i Yelena Ximina, Ichki ishlar vazirligi huzuridagi Tergov qo‘mitasining sobiq tergovchisi Oleg Urjumsev, advokatlar Andrey Pavlov va Yuliya Mayorova, tijorat tuzilmalari direktorlari Gennadiy Plaksin, Dmitriy Klyuev va Aleksey Sheshenya, ishbilarmonlar Vyacheslav Xlebnikov va Viktor Markelov singari kishilar kiritilgan. Britaniya hukumati ularni QQSni qaytarish bo‘yicha firibgarlik va korrupsiyaga, shuningdek Magnitskiy ishiga aloqador deb hisoblaydi.

Sanksiyalar Londonning 2018-yildagi Jinoiy faoliyatdan olingan daromadlarni legallashtirishga qarshi kurashish to‘g‘risidagi qonuniga mos keladi. Unda Britaniya hukumati korrupsiyaga aloqador deb topgan tashkilotlar va shaxslarga cheklovlar qo‘yish belgilangan.

Buyuk Britaniyaning sanksiyalari ostida qolgan fuqarolarning Buyuk Britaniyaga kirishi taqiqlanadi va ularning mamlakatdagi aktivlari muzlatib qo‘yiladi. Bundan tashqari, Buyuk Britaniya fuqarolari va mahalliy tashkilotlarga sanksiya ostidagi shaxslar bilan moliyaviy operatsiyalarni o‘tkazmaslik tavsiya etiladi.

Advokat va auditor Sergey Magnitskiy Rossiyada 2008-yilda Hermitage Capital fondining soliq to‘lashdan bo‘yin tovlash ishi bilan hibsga olingan. U 2009-yilda “Matrosskaya Tishina” tergov izolyatorida vafot etdi. Vafotidan keyin 2013-yilda aybdor deb topildi. Hermitage Capital rahbari Uilyam Brauderning so‘zlariga ko‘ra, Magnitskiyni ta’qib qilish uning Rossiya byudjetidan mablag‘ olib chiqishning korrupsion sxemasini fosh qilgani bilan bog‘liq.

Prezident Vladimir Putin 2018-yilda Donald Tramp bilan muzokaralar yakunlariga ko‘ra “Brauderning biznes sheriklari Rossiyada noqonuniy ravishda 1,5 milliard dollardan ko‘proq daromad olgan, na Rossiyada, na Birlashgan Qirollikda soliq to‘lamagan. Ammo bu pul AQShga o‘tkazilgan”.

2012-yilda Qo‘shma Shtatlar “Magnitskiy akti”ni qabul qildi, u inson huquqlarini buzishda ishtirok etgan rossiyaliklarga qarshi shaxsiy sanksiyalarni joriy etishga imkon beradi. 2020-yil dekabrda Yevropa Ittifoqi xuddi shunday cheklov rejimini tasdiqladi. 2021-yil 26-aprelda Buyuk Britaniyaning sanksiyalari ostida qolgan rossiyaliklarga bungacha AQSh va Yevropa Ittifoqi tomonidan ham cheklovlar joriy qilingan edi.