Britaniyaning Car and Classic auksionida 1969-yilda ishlab chiqarilgan “Zaporojets” sotuvga qo‘yildi. Haqiqiy “vaqt kapsulasi” bo‘lgan avtomobil deyarli yo‘l bosmagan, deb yozadi CARakoom.
E’londa ta’kidlanishicha, “Zaporojets” so‘nggi 30 yil ichida faqat garajda saqlangan. Oxirgi marotaba 1987-yilda harakatlanib, so‘nggi bor texnik ko‘rikdan o‘tkazilgan. 52 yillik noyob mashinaning odometriga ko‘ra, mashina 144 kilometr yo‘l bosgan.
Uzoq vaqt harakatsiz turganiga qaramay, avtomobil ajoyib holatda bo‘lib, faqatgina salonidagi qurilmalar panelida qalin changni uchratish mumkin. Biroq eng muhimi mashinadagi ehtiyot qismlarining barchasi original.
Sotuvchining so‘zlariga ko‘ra, “Zaporojets” eksport variant hisoblanadi — u Chexiyada yig‘ilgan. Hozirda u Latviyada saqlanmoqda. Sotuvchi avtomobilga qo‘shib uning barcha zaruriy hujjatlarini taqdim etishga tayyor. Noyob avtomobil 8 ming funtga (11,1 ming dollar) baholanmoqda.
Avvalroq Ukrainada payvandlab tashlangan garajdan mutlaqo yangi “Zaporojets” topilgani to‘g‘risida xabar berilgandi.
Izoh (0)