YouTube’dagi Restore Machines kanalida tanib bo‘lmas ahvolga kelib qolgan Ferrari LaFerrari o‘yinchoq modelini restavratsiya qilish jarayoni tasvirlangan video paydo bo‘ldi.
Deyarli umidsiz avtomobillar modellarini “qayta tiriltirish”ga ixtisoslashgan Restore Machines ustasi birinchi navbatda LaFerrari’ni qismlarga ajratib chiqqan. Kuzov panellari va boshqa yirik detallarini chiqarib olib, tozalagan, silliqlagan va aerograf bilan bo‘yagan. Prujina va vintlar zangini ketkazish uchun maxsus eritmaga solingan.
Shundan so‘ng mashinaning tag qismi va boshqa egilgan ehtiyot qismlari biroz qizdirilib, imkon qadar oldingi shaklga qaytarilgan. Yarim kuygan orqa suyanchiq omon qolgan o‘rindiq yordamida qayta tiklangan. Bu kabi usul orqali u faralardan birini ham tayyorlagan.
Boshqa yangi ehtiyot qismlari qatoridan radiator panjarasi, oyna va kuzovdagi yorliq o‘rin olgan. Bundan tashqari, erib ketgan “pokrishka”lar o‘rniga yangisi o‘rnatilgan: usta uni Lamborghini Aventador’dan olib turgan.
Natijada LaFerrari “yangi hayot”ga qaytgan. E’tiborli jihati ushbu model u qadar katta qiymatga ega emas: Amazon orqali 2 ming rublga (26 dollar) xarid qilish mumkin.
Avvalroq amerikalik erkak qordan Ford Bronco’ning haqiqiy o‘lchamidek keladigan nusxasini yasagani to‘g‘risida xabar berilgandi.
Izoh (0)