Адлия вазири Русланбек Давлетов 22 апрель куни Tashkent Law Spring II халқаро юридик форумининг очилиш маросимида қонунчиликни рақамлаштириш масалага тўхталиб ўтди. «Gazeta.uz»нинг ёзишича, вазир қонунчиликни рақамлаштиришни энг муҳим ва мураккаб жараён деб атади, чунки «ривожланаётган технологиялардан қандай фойдаланиш керак, бор тартиб ва қоидаларга путур етказиб, тескари натижалар олиб келмайдими, деган саволлар устида ўйлаш керак».
«Биз бир йил олдин қонунчилик ҳужжатлари лойиҳаларини электрон ишлаб чиқиш ва келишиш тизимини киритдик ва бу жуда қўл келди, ҳозиргача 1000 та ҳужжат бу тизим орқали ўтди, биринчи марта эса идоравий ҳужжатни тўлиқ электрон шаклда қабул қилдик», — деган у.
Вазирнинг сўзларига кўра, қонун чиқаришда шаффофликнинг муҳим элементи манфаатдор томонларнинг қонун ижодкорлигида кенг иштироки ҳисобланади. Кўпгина мамлакатларда, шу жумладан, Ўзбекистонда қонун лойиҳаларини жамоатчилик муҳокамасига жойлаштириш учун мўлжалланган махсус веб-порталлар мавжуд.
Унинг таъкидлашича, умуман олганда, буни тўғридан-тўғри демократиянинг намоён бўлиши деб аташ мумкин. Аммо, афсуски, бу соҳадаги улкан имкониятлардан тўлиқ фойдаланилмаяпти.
«Айрим вазирлик ва идоралар тор доирадаги манфаатларни илгари суриш учун ҳам жамоатчилик муҳокамасидан фойдаланмасликка ҳаракат қилади, чунки билади катта танқид остида қолишини, мана шунинг учун ҳам бу механизм жуда катта аҳамиятлидир.
Ёки бўлмаса, бир гуруҳ шахслар томонидан алоҳида саволларни кичкина муаммони маълум бир йўл билан ҳал қилишда кўпчилик қизиқиш билдираётгандек кўрсатиш орқали ёлғон таассурот уйғотиши, яъни жамоатчилик фикрини манипуляция қилиши мумкин. Бу ҳам мавжуд хавф-ҳатардир. Биз барча суиистеъмолчиликларга тайёр туришимиз керак ва юридик ҳамжамият қонун ижодкорлиги соҳасида жамоатчилик билан ўзаро алоқада мақбул ечимни топиши лозим», — деган Русланбек Давлетов.
Адлия вазири давлат органлари фаолиятини такомиллаштириш ва очиқлигини таъминлаш муҳимлигини қайд этган.
«Амалиёт шуни кўрсатмоқдаки, мамлакатимизда давлат ва халқ ўртасидаги мулоқотнинг энг қулай шакли мобил иловалардир. Мазкур соҳада кўринмас давлат концепциясининг улкан салоҳияти мавжуд, бунда давлат билан боғлиқ ҳар қандай масалани онлайн режимда ҳал қилиш мумкин», — деган у.
Русланбек Давлетовнинг маълум қилишича, бу борадаги кенг кўламли чора-тадбирларни амалга ошириш мақсадида Адлия вазирлиги томонидан «Очиқ ва ҳисобдор ҳукумат» лойиҳаси ишлаб чиқилиб, ҳукуматга киритилди.
Изоҳ (0)