O‘zbekiston Prezidenti qaroriga asosan general-mayor Azizbek Ikromov ichki ishlar vazirining o‘rinbosari – Ma’naviy-ma’rifiy ishlar va kadrlar bilan ta’minlash departamenti boshlig‘i lavozimiga tayinlandi. Bu haqda vazirlik matbuot xizmati xabar qildi.
Tayinlovga qadar Azizbek Ikromov ichki ishlar vazirining jamoat tartibini saqlash bo‘yicha o‘rinbosari lavozimida faoliyat yuritgan.
Azizbek Ikromov 2019-yilning noyabridan buyon ichki ishlar vaziri o‘rinbosari lavozimida ishlab kelmoqda. U 2020-yil fevralida qo‘shimcha ravishda mahalla va oilani qo‘llab-quvvatlash vaziri o‘rinbosari etib tayinlangan edi.
Azizbek Ikromov ushbu lavozimdan 2021-yil 20-yanvarda ozod qilingan.
Shuningdek, general-mayor Bahodir Mirzarahimov ichki ishlar vazirining o‘rinbosari – Transport va turizm obyektlarida xavfsizlikni ta’minlash departamenti boshlig‘i lavozimiga tayinlandi.
Tayinlovga qadar Bahodir Mirzarahimov ichki ishlar vazirining jazolarni ijro etishni ta’minlash va harbiy tuzilmalar bo‘yicha o‘rinbosari lavozimida faoliyat yuritgan.
Bundan tashqari, polkovnik Bekmurod Abdullayev ichki ishlar vazirining o‘rinbosari – Jamoat xavfsizligi departamenti boshlig‘i lavozimiga tayinlandi.
Tayinlovga qadar Bekmurod Abdullayev O‘zbekiston Milliy gvardiyasi qo‘mondonining jamoat xavfsizligini ta’minlash bo‘yicha birinchi o‘rinbosari lavozimida faoliyat yuritgan.
Bundan avval Farg‘ona viloyatining Furqat tumaniga yangi hokim hamda Surxondaryo viloyati hokimiga yangi o‘rinbosar tayinlangani haqida xabar berilgandi.
Izoh (0)