Xitoyda reklamaning yangi formati paydo bo‘ldi — yuzlab uchuvchisiz boshqariladigan uchish apparatlari yordamida osmonda biror mahsulot yoki uning havolasi keltirilgan QR-kodni hosil qilish mumkin, deb xabar beradi Hi-Tech.Mail.ru.
Shanxay aholisi yuzlab dronlar yordamida yangi mobil o‘yinni reklama qilishga qaror qildi — osmonda o‘yin nomi va uning qahramonlari namoyish etildi, yakunda esa odamlar smartfonlari yordamida skaner qilishi mumkin bo‘lgan ulkan QR-kod ishga tushirildi. Mazkur tajriba reklamasi qanchalik muvaffaqiyatli chiqqani noma’lum, biroq taxminlarga ko‘ra, kelajakda bu kabi reklamalar soni ortadi.
Dronlar shousiga Xitoyning Damoda Intelligent Control Technology kompaniyasi ma’sul bo‘lgan bo‘lib, u aprel boshida bir vaqtning o‘zida 3200 ta dronni havoga ko‘tarib, jahon rekordini o‘rnatgan edi. Mobil o‘yin reklamasi uchun bundan ikki barobar kamroq apparat talab etilgan.
Bu turdagi reklamalarning muammosi ularning qimmatligi va amalga oshirish murakkabligida — bir necha yuz dronlarni tayyorlash kerak, ularning barchasi sozlangan va quvvatlantirilgan bo‘lishi lozim. Bitta uchuvchisiz boshqariladigan uchish apparatining akkumulyatori maksimum 20-25 daqiqaga yetadi. Noqulay ob-havo yoki oddiy shamol ham barchasini barbod qilishi mumkin.
Avvalroq Rossiyada 500 dan ortiq dron yordamida Gagarinning kosmosga parvozi tasvirlangani to‘g‘risida xabar berilgandi.
Izoh (0)