Хитойда рекламанинг янги формати пайдо бўлди — юзлаб учувчисиз бошқариладиган учиш аппаратлари ёрдамида осмонда бирор маҳсулот ёки унинг ҳаволаси келтирилган QR-кодни ҳосил қилиш мумкин, деб хабар беради Hi-Tech.Mail.ru.
Шанхай аҳолиси юзлаб дронлар ёрдамида янги мобил ўйинни реклама қилишга қарор қилди — осмонда ўйин номи ва унинг қаҳрамонлари намойиш этилди, якунда эса одамлар смартфонлари ёрдамида сканер қилиши мумкин бўлган улкан QR-код ишга туширилди. Мазкур тажриба рекламаси қанчалик муваффақиятли чиққани номаълум, бироқ тахминларга кўра, келажакда бу каби рекламалар сони ортади.
Дронлар шоусига Хитойнинг Damoda Intelligent Control Technology компанияси маъсул бўлган бўлиб, у апрель бошида бир вақтнинг ўзида 3200 та дронни ҳавога кўтариб, жаҳон рекордини ўрнатган эди. Мобил ўйин рекламаси учун бундан икки баробар камроқ аппарат талаб этилган.
Бу турдаги рекламаларнинг муаммоси уларнинг қимматлиги ва амалга ошириш мураккаблигида — бир неча юз дронларни тайёрлаш керак, уларнинг барчаси созланган ва қувватлантирилган бўлиши лозим. Битта учувчисиз бошқариладиган учиш аппаратининг аккумулятори максимум 20-25 дақиқага етади. Ноқулай об-ҳаво ёки оддий шамол ҳам барчасини барбод қилиши мумкин.
Аввалроқ Россияда 500 дан ортиқ дрон ёрдамида Гагариннинг космосга парвози тасвирлангани тўғрисида хабар берилганди.
Изоҳ (0)