Namanganda do‘stining nojo‘ya ko‘rinishdagi suratlarini tarqatish bilan tahdid qilib, undan 20 mln so‘m talab qilgan shaxslar qo‘lga olindi

Namanganda 32 yoshli yigitning nojo‘ya ko‘rinishdagi fotolarini tarqatish bilan tahdid qilib, undan 20 million so‘m talab qilgan shaxslar qo‘lga olindi. Bu haqda “Daryo”ga viloyat IIB axborot xizmati ma’lum qildi.

Voqea 2021-yil 8-aprel kuni Yangiqo‘rg‘on tumanida sodir bo‘ldi. Ushbu tumanda yashovchi, 1989-yilda tug‘ilgan fuqaroning xonadoniga Chortoq tumanida istiqomat qiluvchi ikki tanishi mehmon bo‘lib keladi. Ular birgalikda spirtli ichimlik iste’mol qilib, mezbonning mast bo‘lib qolganidan foydalangan mehmonlar qaltis hazilga qo‘l uradi: yigitning egnidagi barcha kiyimlarini yechib olib, telefonlarida tasvirga oladi. Lavhada xonadonda saqlab kelinayotgan quritilgan ukrop va oshko‘k giyohvand moddalar sifatida talqin qilinadi.

Mezbon o‘ziga kelganida og‘aynilari undan ushbu videotasvirni internet tarmog‘i orqali tarqatib, sharmanda qilish bilan qo‘rqitadi. Bunday qilmaslik evaziga esa 20 million so‘m talab qiladi.

Jabrlanuvchi mazkur holat yuzasidan 13-aprel kuni ichki ishlar idoralariga murojaat qildi. Viloyat IIB Jinoyat-qidiruv boshqarmasi xodimlari tomonidan o‘tkazilgan tadbir davomida Namangan shahridagi Hamroh ko‘chasida arizada nomi keltirilgan shaxslar fuqarodan maxsus kimyoviy ishlov berilgan 20 million so‘mni olgan paytda tezkor tadbir ishtirokchilari tomonidan ushlandi.

Namangan shahar Ichki ishlar organlari faoliyatini muvofiqlashtirish boshqarmasi huzuridagi tergov bo‘limi tomonidan 15-aprel kuni ushbu holat yuzasidan Jinoyat kodeksining 165-moddasi 2-qismi bilan jinoyat ishi qo‘zg‘atildi. Hozirda surishtiruv ishlari olib borilmoqda.

Bundan avval Samarqandda erkakning o‘zga ayol bilan yozishmalarini xotiniga ko‘rsatmaslik evaziga 14 million so‘m talab qilgan ayol ushlangani, Samarqanddagi restoranda 1 million so‘mga ovqatlanib, pul to‘lamasdan ketgan shaxsning telefon va pullarini olib qo‘ygan ofitsiantga nisbatan jinoiy ish qo‘zg‘atilgani, Samarqandda 21 yoshli qizning shaxsiy suratlarini tarqatib yubormaslik evaziga 400 dollar so‘ragan institut o‘qituvchisi ushlangani hamda Toshkent viloyatida tanishining suratlarini internetda tarqatish bilan qo‘rqitib, undan 5 million so‘m talab qilgan nigeriyalik ushlangani  haqida xabar berilgandi.