Namangan viloyatida 2021-yil birinchi choragida sudlar tomonidan 825 ta jinoyat ishi ko‘rib chiqildi. Bu 2020-yilning shu davriga nisbatan 40 foiz yoki 238 taga ko‘p. Bu haqda “Daryo”ga viloyat sudi raisi Abdurasul Eranov ma’lum qildi.
Eranovning aytishicha, shu bois jinoyat ishlari bo‘yicha sudyalarning ish hajmi 2020-yilga solishtirilganda oyiga o‘rtacha 8,8 foizga ortgan.
“Viloyatda 2021-yil birinchi choragida hukm chiqarilib yakunlangan ishlarning aksariyatini qasddan badanga tan jarohati yetkazish, o‘g‘rilik, firibgarlik, bezorilik, o‘zlashtirish yoki rastrata yo‘li bilan talon-toroj qilish, transportdan foydalanish qoidalarini buzish, shtamp va hujjatlar, muhr va blankalarni qalbakilashtirish jinoyatlari tashkil etdi”, — deydi viloyat sudi raisi.
Insonparvalik tamoyiliga asoslangan holda 6 nafar shaxs oqlanib, 55 nafari sud zalida qamoqdan ozod qilindi.
Shu bilan birga, viloyatda 2021-yilning dastlabki uch oyi davomida jami sudlangan shaxslarning 224 nafari yoki 21,3 foizini takroran jinoyatga qo‘l urganlar tashkil etdi.
“Namanganda 2021-yil 1-choragida 109 nafar ayolga nisbatan jinoyat ishlari ko‘rib chiqilib, ulardan 91 nafariga jazo tayinlandi. Bu ko‘rsatkich ham 2020-yilga nisbatan 25 kishiga ortgan. Umuman, viloyatda 2021-yil uch oyi davomida jami sudlangan shaxslarning 12,6 foizini ayollar tashkil etgan”, — deydi Abdurasul Eranov.
Izoh (0)