Sud hay’ati Minneapolis shahrining sobiq politsiyachisi Derek Shovinni afroamerikalik Jorj Floydni ehtiyotsizlik orqasida odam o‘ldirishda aybdor deb topdi. Bu haqda Meduza xabar bermoqda.
Shovin ayblovning barcha uchta bandi bo‘yicha aybdor deb topildi. Ularning eng og‘iri — qasddan sodir etilmagan ikkinchi darajali qotillik — 40 yilgacha ozodlikdan mahrum etishni ko‘zda tutadi.
Shovinga nisbatan hukm taxminan sakkiz haftadan keyin o‘qiladi.
Shovinning o‘zi aybini tan olmadi va sudda ko‘rsatma berishdan bosh tortdi.
Suddan keyin Shovin Minnesota shtatidagi Ouk-Park-Xayts axloq tuzatish muassasasiga joylashtirildi.
Sud hay’ati sobiq politsiyachini aybdor deb topganidan keyin AQSh prezidenti Jo Bayden va vitse-prezident Kamala Harris Jorj Floydning oilasiga qo‘ng‘iroq qildi. AQSh prezidenti sud jarayonini bosh maslahatchisi va vitse-prezident bilan birgalikda kuzatib borganini ta’kidladi. O‘z navbatida, Harris Floydning oilasini tarixga o‘zgarish yasaydigan bir paytda “haqiqiy yetakchilik” ko‘rsatgani uchun maqtadi.
Jorj Floyd Minneapolisda 2020-yil may oyida o‘ldirilgan edi. Uni 20 dollarlik qalbaki puldan foydalanishda gumon qilib qo‘lga olishga urinishgan. Qo‘lga olish paytida Derek Shovin tizzasi bilan Floydning bo‘ynini bosib, sakkiz daqiqacha shu holatda turgan, afroamerikalik nafas ololmayotgani haqida bir necha marta aytgani kor qilmagan.
Floydning o‘limi dastlab Minneapolisda, so‘ng AQShning qolgan barcha shaharlarida, undan keyin dunyoning boshqa mamlakatlarida ham irqchilikka qarshi norozilik namoyishlarini keltirib chiqardi. Shovin va uning Floydni hibsga olishda ishtirok etgan ikki nafar hamkasbi politsiyadan quvildi va ularga nisbatan ayblovlar e’lon qilindi.
Ikkinchi darajali qotillik — AQShda qasddan sodir etilmagan qotillik shunday ataladi. Buning uchun birinchi darajali (qasddan sodir etilgan) qotillikdagi kabi qat’iy jazo ko‘zda tutilmagan.
Mavzuga doir:
- Marhum Jorj Floyd oilasiga 27 mln dollar miqdorida kompensatsiya to‘lanadi
- AQSh sudi qora tanli Jorj Floydni o‘ldirgan sobiq politsiyachiga qarshi ayblovlarning bir qismini bekor qilish masalasini qayta ko‘rib chiqadi
- AQShda o‘limi xalqning norozilik namoyishlari o‘tkazishiga sabab bo‘lgan afroamerikalik Jorj Floydning dafn marosimi bo‘lib o‘tdi (fotogalereya)
Izoh (0)