Kim Chen Inning rafiqasi bir yil ichida ilk marotaba ommaga ko‘rinish berdi

Shimoliy Koreya yetakchisi Kim Chen Inning rafiqasi Li Sol Chju bir yildan oshiq vaqtdan beri jamoatchilik oldida ko‘rinmay kelayotgandi. 16-fevral, seshanba kuni Li Sol Chju turmush o‘rtog‘i bilan KXDR marhum rahbari Kim Chen Ir tug‘ilgan kun — “Yo‘lchi yulduz kuni” sharafiga tashkil qilingan konsertga tashrif buyurdi. Bu haqda Shimoliy Koreya markaziy telegraf agentligi (KMTA) ma’lumotiga tayanib “RBK” xabar berdi.

Xabarga ko‘ra, Kim Chen In va uning rafiqasi “Mansude” badiiy teatrida hukumat boshqarmasi va partiyaning markaziy qo‘mita a’zolari bilan birgalikda “Yulduz kuni”ga bag‘ishlangan konsertni tomosha qilgan.

“Bosh kotib va ​​uning rafiqasi Li Sol Chju teatr zaliga qadam qo‘yishi bilan barcha tomoshabinlar ularni qarshilash uchun baland ovozda ‘Ura!’ deb baqirdi”, — deyiladi KMTA xabarida. Konsertda Kim Chen Irni madh etgan qo‘shiqlar, shuningdek, bosh kotib Kim Chen Inning sharafiga yozilgan asarlar ijro etilgan.

KMTA agentligining ushbu xabarga biriktirgan fotosuratlaridan ko‘rinib turibdiki, Li Sol Chju va Kim Chen In hurmati joyiga qo‘yilgan holda auditoriya markazida o‘tirib, tabassum bilan spektaklda qarsak chalmoqda. Bosh kotibning rafiqasi konsert uchun to‘g‘nog‘ich bilan bezatilgan to‘q ko‘k rangdagi kostyum kiygan. E’tiborlisi shundaki, fotosuratda undan tashqari boshqa ayollar, jumladan, Kim Chen Inning singlisi Kim Yo Chjong yo‘q. Shuningdek, tomoshabinlarning hech biri niqob taqmagan.

https://twitter.com/arirangtvnews/status/1361863071413673984

Oxirgi marta Li Sol Chju 2020-yil 25-yanvarda omma oldida ko‘rinish bergandi. O‘shanda u va turmush o‘rtog‘i Yangi yil munosabati bilan “Samjien” musiqiy teatrining bayramona tomoshasiga borgan. Li Sol Chjuning OAV oldida uzoq vaqt ko‘rinish bermagani uning kasal yoki homilador bo‘lishi mumkinligi to‘g‘risida ko‘plab mish-mishlarga sabab bo‘ldi. Shuningdek, Koreya Milliy birlashish instituti mutaxassisi Xong Min uning “yo‘q bo‘lib ketishi” koronavirusga qarshi choralar bilan bog‘liq bo‘lishi mumkinligini ta’kidlagan, vaholanki, ilgari Shimoliy Koreya rasmiylari mamlakatda virus mavjudligini rad etgan. Shuningdek, tahlilchilar Li Sol Chju mamlakatdan qochib ketgan degan taxminni ilgari surgan.

Li Sol Chju jamoat maydonida bo‘lmagan paytda Shimoliy Koreya yetakchisi rasmiy tadbirlarga o‘zining sobiq sevgilisi, shimoliy koreyalik pop yulduzi Xyon Son Vol bilan kelgan.

KXDR rahbarlarining rafiqalari orasida birinchi marta Li Sol Chju turmush o‘rtog‘i bilan jamoatchilik oldida ko‘rinish bergan. Uning Kim Chen In bilan nikohi 2012-yilda Shimoliy Koreya OAV tomonidan rasman e’lon qilingandi.

2020-yilning oktabr oxiridan noyabr o‘rtasiga qadar Kim Chen In 25 kun davomida ommaga ko‘rinish bermagan. Bunga qadar Kim Chen In 2020-yilning bahorida ikki marta ko‘rinmay ketgandi. Aprel oyida u 10 kun jamoatchilikka ko‘rinish bermagan. OAVlar Shimoliy Koreya yetakchisining uzoq vaqt ko‘rinmay qolganini uning sog‘lig‘i bilan bo‘liq bo‘lishi mumkin, deb taxmin qilgan.