Ukrainaning Auto.ria.com sayti orqali 1994-yilda ishlab chiqarilgan va tyuning qilingan Mercedes-Benz E 320 sotuvga qo‘yildi. Eksteryeri va interyeridagi ko‘plab o‘zgarishlar sabab kupe tanib bo‘lmas darajaga kelib qolgan, deb yozadi Motor.
Ukrainalik tyunerlar Mercedes-Benz’ga yangi old optika o‘rnatgan, orqa fonarlarini o‘zgartirgan, shuningdek, bamperi, radiator panjarasini almashtirgan, yukxona qopqog‘ini jihozlagan. Mutaxassislar avtomobil kuzovini qora-oq ranglar gammasiga bo‘yagan. Tashqi ehtiyot qismlari orasida donor Mercedes’dan “tablichkasi” va zavoddagi eshigi qolgan, xolos.
Ukrainaliklar E-class’ning interyerida ham qator o‘zgartirishlarni amalga oshirgan. Tyunerlar kupe salonini oq va kulrang charm bilan qoplagan, rul chambaragi, eshik kartlari va “torpedo” qismida qizil R harfi paydo bo‘lgan. Bundan tashqari, avtomobilga multimedia displeyi, yangi audiotizim va atmosferali “podveska” o‘rnatilgan.
Modifikatsiyaga uchragan Mercedes-Benz 225 ot kuchiga ega 3,2 litrli benzin dvigatel yordamida harakatga keladi, agregat avtomatik transmissiya yordamida boshqariladi. Sotuvga qo‘yilgan mashina hozirga qadar 187 ming kilometr yo‘l bosgan bo‘lib, u butunlay soz holatda.
Avtomobil egasi 27 yillik Mercedes-Benz’ini 10 ming dollarga sotishga tayyor.
Avvalroq Bring a Trailer auksionida 1952-yilda ishlab chiqarilgan qora Mercedes-Benz 220 Cabriolet A sotuvga qo‘yilgani to‘g‘risida xabar berilgandi.
Izoh (0)