Niderlandiyadagi tashlandiq garaj ichidan Range Rover yo‘ltanlamaslari kolleksiyasi, shuningdek, boshqa markadagi bir nechta avtomobillar topildi. E’lon qilingan suratlarga ko‘ra, mashinalarning deyarli barchasi achinarli ahvolda va yo‘llarda harakatlana olishi dargumon, deb xabar beradi Motor.
Tashlandiq Range Rover’lar devorlari buzilgan g‘ishtli omborga o‘xshovchi eski garaj ichidan topilgan. Vayrona yonidagi hududda o‘ndan ortiq Britaniya yo‘ltanlamaslari joylashgan bo‘lib, ular ayanchli ahvolda. Avtomobillar chang va zang bilan qoplangan, mashinalarning aksariyatini shinalari “o‘tirib” qolgan.
Garajdagi Range Rover’larning aksariyati birinchi va ikkinchi avlod modellari hisoblanadi. Suratlarda klassik modifikatsiyadan tashqari ochiq kuzovli va yumshoq tomli versiyalarni ham uchratish mumkin. Avtomobillarning bu kabi versiyalari maxsus buyurtma asosida yaratilgan. Bundan tashqari, tashlandiq mashinalar orasida R107 va R123 kuzovidagi ikkita klassik Mercedes-Benz’ni ham uchratish mumkin.
Mazkur avtomobillar “qabristoni” kimga tegishli ekanligi va modellar nima sababdan bu kabi holatdaligi noma’lum.
Avvalroq britaniyalik suratkash Emi Shor mamlakatdagi Land Rover yo‘ltanlamaslari qabristonini topib olgandi. U yerda asosan “umrini yashab bo‘lgan” birinchi avlod Range Rover’lari joylashgan, biroq ular orasida ikkinchi avlodga tegishli nusxalar, shuningdek, klassik Land Rover Defender’larni ham uchratish mumkin edi.
Izoh (0)