Украинанинг Auto.ria.com сайти орқали 1994 йилда ишлаб чиқарилган ва тюнинг қилинган Mercedes-Benz E 320 сотувга қўйилди. Экстерери ва интерьеридаги кўплаб ўзгаришлар сабаб купе таниб бўлмас даражага келиб қолган, деб ёзади Motor.
Украиналик тюнерлар Mercedes-Benz’га янги олд оптика ўрнатган, орқа фонарларини ўзгартирган, шунингдек, бампери, радиатор панжарасини алмаштирган, юкхона қопқоғини жиҳозлаган. Мутахассислар автомобиль кузовини қора-оқ ранглар гаммасига бўяган. Ташқи эҳтиёт қисмлари орасида донор Mercedes’дан «табличкаси» ва заводдаги эшиги қолган, холос.
Украиналиклар E-class’нинг интерьерида ҳам қатор ўзгартиришларни амалга оширган. Тюнерлар купе салонини оқ ва кул ранг чарм билан қоплаган, рул чамбараги, эшик картлари ва «торпедо» қисмида қизил R ҳарфи пайдо бўлган. Бундан ташқари, автомобилга мултимедиа дисплейи, янги аудиотизим ва атмосферали «подвеска» ўрнатилган.
Модификацияга учраган Mercedes-Benz 225 от кучига эга 3,2 литрли бензин двигатель ёрдамида ҳаракатга келади, агрегат автоматик трансмиссия ёрдамида бошқарилади. Сотувга қўйилган машина ҳозирга қадар 187 минг километр йўл босган бўлиб, у бутунлай соз ҳолатда.
Автомобиль эгаси 27 йиллик Mercedes-Benz’ини 10 минг долларга сотишга тайёр.
Аввалроқ Bring a Trailer аукционида 1952 йилда ишлаб чиқарилган қора Mercedes-Benz 220 Cabriolet А сотувга қўйилгани тўғрисида хабар берилганди.
Изоҳ (0)