Mirjalol Qosimov “Shabob Ah-Ahli”ga qarshi o‘yin haqida: “Har ikkala jamoa bir xil holatda”

Osiyo Chempionlar Ligasi guruh bosqichi 3-turi doirasida bo‘lib o‘tadigan “Shabob Al-Ahli” — OKMK bellashuvidan avval matbuot anjumani o‘tkazildi. Unda Olmaliq klubi bosh murabbiyi Mirjalol Qosimov va yarim himoyachi Sanjar Tursunov ishtirok etdi.

Avvalambor, assalomu alaykum! Juda ham muhim o‘yin bizni kutmoqda. O‘tgan o‘yinda mag‘lub bo‘lganimiz tufayli ham “Shabob Al-Ahli” bilan bo‘ladigan ikki bahs hal qiluvchi ahamiyatga ega. O‘ylaymanki, “Shabob Al-Ahli” ham shu fikrda. Raqib ham o‘tgan tur mag‘lub bo‘ldi va har ikkala jamoa endilikda faqat g‘alaba uchun kurashadi. Guruhimizda bo‘sh jamoaning o‘zi yo‘q va oson o‘yinlar ham yo‘q. Har bir bahs muhim ahamiyatga ega. Bo‘lajak uchrashuvga tayyormiz. Futbol shunday o‘yin va unda g‘alaba bilan mag‘lubiyat yonma-yon yuradi. O‘tgan o‘yindagi xatolarimiz xususida xulosalar qilindi, futbolchilar bilan gaplashib oldik. “Shabob Al-Ahli” bilan o‘yinda xatolarni yo‘qqa chiqarishga harakat qilamiz. Yaxshi va chiroyli o‘ynab, imkon qadar ko‘proq vaziyatlar sodir etishga urinamiz.

Jamoalarning guruhdagi o‘rni o‘yinga qanchalik ta’sir o‘tkazishi haqida (OKMK 3-o‘rin, “Shabob Ah-Ahli” esa 4-pog‘onada joylashgan)

Har ikkala jamoa bir xil holatda. Dastlab durang o‘ynadik va o‘tgan turda mag‘lubiyatga uchradik. Shu boisdan ham avval ta’kidlaganimdek, qatorasiga ikkita o‘yin har ikkala jamoa uchun hal qiluvchi bo‘ladi. Bu to‘qnashuv kimnidir imkoniyatlarini oshirsa, kim uchundir imkoniyatlarni yopadi. Shu taraflama ham mazkur o‘yinlar yanada qiziq bo‘ladi.

Mazkur uchrashuvdagi mag‘lubiyat keyingi o‘yinlarda qanchalik ta’sir ko‘rsatishi haqida

Bu yaxshi tarafga ham yoki yomon tomonlama ham ta’sir qilishi mumkin. Xatolardan xulosa chiqargan holda bo‘lajak o‘yinga tayyorgarlik ko‘ryapmiz. Xato va kamchiliklarni bartaraf etib, ertangi bahsda muvaffaqiyat qozonishga harakat qilamiz. Boshqa yo‘l yo‘q. Maqsad muxlislarimizni xursand qilish.

Mirjalol Qosimov, OKMK bosh murabbiyi

Ertangi o‘yinda faqat g‘alaba uchun chiqamiz. Hozirgi vaziyat shuni taqozo etadi. O‘zimizning xatomiz tufayli guruhda shunday vaziyatga tushib qoldik. Shu bois faqat g‘alabani qo‘lga kiritishga bor kuchimizni sarflaymiz. Murabbiyimizning gaplariga qo‘shilaman, o‘tgan o‘yindagi mag‘lubiyat yaxshi tomonlama ham yoki aksincha tarafga ham ta’sir etishi mumkin. Ertangi bahs juda ham qiziqarli bo‘ladi. Bizga ham, raqibga ham yutuq kerak. Har ikkala tomon bir xil holatda. Shunisi aniqki, bo‘lajak bahsda faqat g‘alaba uchun kurashamiz.

Sanjar Tursunov, OKMK yarim himoyachisi