Миржалол Қосимов «Шабоб Аҳ-Аҳли»га қарши ўйин ҳақида: «Ҳар иккала жамоа бир хил ҳолатда»

Осиё Чемпионлар Лигаси гуруҳ босқичи 3-тури доирасида бўлиб ўтадиган «Шабоб Ал-Аҳли» — ОКМК беллашувидан аввал матбуот анжумани ўтказилди. Унда Олмалиқ клуби бош мураббийи Миржалол Қосимов ва ярим ҳимоячи Санжар Турсунов иштирок этди.

Авваламбор, ассалому алайкум! Жуда ҳам муҳим ўйин бизни кутмоқда. Ўтган ўйинда мағлуб бўлганимиз туфайли ҳам «Шабоб Ал-Аҳли» билан бўладиган икки баҳс ҳал қилувчи аҳамиятга эга. Ўйлайманки, «Шабоб Ал-Аҳли» ҳам шу фикрда. Рақиб ҳам ўтган тур мағлуб бўлди ва ҳар иккала жамоа эндиликда фақат ғалаба учун курашади. Гуруҳимизда бўш жамоанинг ўзи йўқ ва осон ўйинлар ҳам йўқ. Ҳар бир баҳс муҳим аҳамиятга эга. Бўлажак учрашувга тайёрмиз. Футбол шундай ўйин ва унда ғалаба билан мағлубият ёнма-ён юради. Ўтган ўйиндаги хатоларимиз хусусида хулосалар қилинди, футболчилар билан гаплашиб олдик. «Шабоб Ал-Аҳли» билан ўйинда хатоларни йўққа чиқаришга ҳаракат қиламиз. Яхши ва чиройли ўйнаб, имкон қадар кўпроқ вазиятлар содир этишга уринамиз.

Жамоаларнинг гуруҳдаги ўрни ўйинга қанчалик таъсир ўтказиши ҳақида (ОКМК 3-ўрин, «Шабоб Аҳ-Аҳли» эса 4-поғонада жойлашган)

Ҳар иккала жамоа бир хил ҳолатда. Дастлаб дуранг ўйнадик ва ўтган турда мағлубиятга учрадик. Шу боисдан ҳам аввал таъкидлаганимдек, қаторасига иккита ўйин ҳар иккала жамоа учун ҳал қилувчи бўлади. Бу тўқнашув кимнидир имкониятларини оширса, ким учундир имкониятларни ёпади. Шу тарафлама ҳам мазкур ўйинлар янада қизиқ бўлади.

Мазкур учрашувдаги мағлубият кейинги ўйинларда қанчалик таъсир кўрсатиши ҳақида

Бу яхши тарафга ҳам ёки ёмон томонлама ҳам таъсир қилиши мумкин. Хатолардан хулоса чиқарган ҳолда бўлажак ўйинга тайёргарлик кўряпмиз. Хато ва камчиликларни бартараф этиб, эртанги баҳсда муваффақият қозонишга ҳаракат қиламиз. Бошқа йўл йўқ. Мақсад мухлисларимизни хурсанд қилиш.

Миржалол Қосимов, ОКМК бош мураббийи

Эртанги ўйинда фақат ғалаба учун чиқамиз. Ҳозирги вазият шуни тақозо этади. Ўзимизнинг хатомиз туфайли гуруҳда шундай вазиятга тушиб қолдик. Шу боис фақат ғалабани қўлга киритишга бор кучимизни сарфлаймиз. Мураббийимизнинг гапларига қўшиламан, ўтган ўйиндаги мағлубият яхши томонлама ҳам ёки аксинча тарафга ҳам таъсир этиши мумкин. Эртанги баҳс жуда ҳам қизиқарли бўлади. Бизга ҳам, рақибга ҳам ютуқ керак. Ҳар иккала томон бир хил ҳолатда. Шуниси аниқки, бўлажак баҳсда фақат ғалаба учун курашамиз.

Санжар Турсунов, ОКМК ярим ҳимоячиси