Nigeriyaning shimoli-sharqidagi Borno shtatida “Boko haram” jangarilari navbatdagi qurolli hujumni amalga oshirdi. Natijada 18 kishi halok bo‘ldi, 21 kishi jarohatlandi. Bu haqda “Korrespondent.net” xabar berdi.
Ma’lumotlarga ko‘ra, hujum bo‘lib o‘tgan Damasak shahriga Borno gubernatori Babagana Zulum tashrif buyurgan edi. U terrorchilarga qarshi kurash davom etishini ta’kidladi.
Uning so‘zlariga ko‘ra, Bornoda joylashgan harbiylarga “Boko haram”ga qarshi kurashish uchun yana 12 ta zirhli texnika berildi.
Nigeriya Qurolli kuchlarining rasmiy vakili Muhammad Yerimaning xabar berishicha, Borno shtatining Mobbar tumanida “Boko haram”ga qarshi navbatdagi operatsiya o‘tkazildi. Aviatsiya ishtirokidagi operatsiya davomida ko‘plab terrorchilar, shuningdek, ushbu guruhning obyektlari yo‘q qilindi.
Avvalroq IShIDga aloqador jangarilar Nigeriyaning shimoli-sharqida joylashgan BMT bazasiga hujum qilgani haqida xabar berildi. Jangarilar Borno shtatining Dikva shahrida joylashgan bazaga hujum qilgan va yoqib yuborgan. Hujum payti BMTning 25 ta xodimi bunker ichiga yashiringan.
Shuningdek, Efiopiyaning Sharqiy Vellega provinsiyasi Oromiya hududida qurollangan odamlar Efiopiya pravoslav cherkoviga hujum qildi. Hujum oqibatida 30 ga yaqin odam halok bo‘ldi. Jangarilar cherkov ruhoniysini o‘ldirib, odamlarni o‘g‘irlab ketgan. Jangarilar changalidan qochib qutulganlar hujumchilarni Oromo ozodlik frontining jangovar qanoti — Oromo Ozodlik armiyasining a’zolari edi, deb da’vo qilmoqda.
Izoh (0)