Rossiyada hibsga olingan gumonlanuvchilar — belaruslik siyosatshunos Aleksandr Feduta, mamlakatdagi muxolif partiya yetakchisi Grigoriy Kostusev va AQShda yashovchi advokat Yuriy Zenkovich Aleksandr Lukashenko hamda uning oila a’zolariga suiqasd uyushtirishga uringan. Bu haqda Lukashenkoning o‘zi ma’lum qilgan, deb yozmoqda Meduza.
Belarus prezidentining so‘zlariga ko‘ra, mazkur harakatlarga tayyorgarlik ortida AQSh maxsus xizmatlari turgan.
“Bu ishga xorijdagi maxsus kuchlar – katta ehtimol bilan, Markaziy razvedka idorasi, Federal qidiruv byurosi va AQShning yana boshqa xizmatlari aralashgan deb o‘ylayapman. Biz ularning Minskka kelib, prezident va uning farzandlariga qarshi suiqasd uyushtirish niyatida bo‘lganligini aniqladik”, – degan Lukashenko.
“Biroq meni amerikaliklarning nima uchun o‘zlarini bunday tutayotgani hayron qoldirdi. Chunki, menimcha, prezidentni yo‘q qilish vazifasini mamlakatdagi eng yuqori siyosiy rahbariyat topshiriq sifatida berishi mumkin”, — deya ta’kidlagan Lukashenko Belarus prezidenti matbuot xizmati e’lon qilgan videoda.
Mavzuga doir: Lukashenko tez orada nafaqaga chiqishini aytdi
Rossiya FXB Belarus DXQning ma’lumotlarini tasdiqlagan va Feduta hamda Zenkovichni Moskvada hibsga olish operatsiyasi o‘zaro hamkorlikda amalga oshirilganini ma’lum qilgan. FXB ma’lumotlariga ko‘ra, ular shaharga AQSh hamda Polshadagi maslahatlashuvlardan keyin Belarus qurolli kuchlarining muxolifat tomonga o‘tgan generallari bilan uchrashish uchun kelgan. FXB axborotida to‘ntarish yozda emas, 9-mayda bo‘lib o‘tishi reja qilinganligi aniqlangani aytilgan.
Aleksandr Feduta 1990-yillarda Aleksandr Lukashenkoning matbuot kotibi bo‘lgan, 2005-yilda uning eng birinchi siyosiy tarjimayi holining muallifi hisoblanadi. Keyinchalik Feduta muxolifat tomoniga o‘tib ketgan.
Zenkovich 2000-yillar boshida “Belarus xalq fronti” muxolifat partiyasining a’zosi bo‘lgan, keyinchalik yuristlik faoliyatini olib borish uchun AQShga ketgan. Belarus fuqaroligidan tashqari AQSh fuqaroligiga ham ega.
2021-yil mart oyida Zenkovich Facebook’da belaruslarni Aleksandr Lukashenkoga qarshi “o‘z-o‘zini himoya qilish guruhlari”ni tuzishga chaqirgandi. Shuningdek, u Svetlana Tixanovskayani Belarus hukumati bilan muzokara olib borishga urinayotgani uchun tanqid qilgan.
Eslatib o‘tamiz, Belarus davlat xavfsizlik qo‘mitasi aprel boshida muxolifat yetakchisi Svetlana Tixanovskayani terrorchilarga aloqador odamlar ro‘yxatiga kiritgandi.
Izoh (0)