Eron Natanzdagi yadro obyektida qo‘poruvchilik harakatini uyushtirgan shaxs mamlakatdan qochib ketganini e’lon qildi

Eron hukumati 17-aprel kuni Natanzdagi yadro obyektida terakt uyushtirgan shaxs haqida ma’lumot berdi. Bu haqda Associated Press xabar tarqatgan.

Eron tomonining axborotiga ko‘ra, Natanzdagi qo‘poruvchilik harakatini 43 yoshli Rizo Karimiy amalga oshirgan. U mamlakat hududini tark etib ulgurgan va xalqaro darajada qidiruvga berilgan.

Tehron uning qay tarzda terrorchilik harakatini sodir etgani, Isroil razvedkasining Karimiy bilan ishlarni muvofiqlashtirib turgani borasidagi qo‘shimcha ma’lumotlarni bermagan.

Avval Eronning Natanz shahrida joylashgan yadro obyektida avariya sodir bo‘lgan. Tehron mazkur salbiy holat oqibatlari tezda bartaraf qilingani, dastlab uranni 60 foizgacha boyitish rejalashtirilgani va keyinchalik mazkur ish yakuniga yetkazilganini bildirgan. AQSh prezidenti Jo Bayden mazkur vaziyatga munosabat bildirib, Eronning uranni 60 foizga boyitishi muzokaralarni yengillashtirmasligini aytgan.

Natanzdagi terrorchilik harakati ortida Isroil turgani taxmin qilingan, biroq qo‘poruvchilik harakatini tashkillashtirishda gumon qilinayotgan ushbu davlat mazkur versiyaga o‘z munosabatini bildirmagan.