Toshkent viloyati Zangiota tumanidagi “Bek-baraka” savdo majmuasida sotuvchini buyumlarini talon-toroj qilib ketgan ayollar qo‘lga olindi, deya xabar qilmoqda IIV matbuot xizmati.
Qayd etilishicha, 2021-yilning 6-aprel kuni soat 05:10 larda 40 yoshli I.N. va 32 yoshli Y.N. ismli ayollar Zangiota tumanida joylashgan “Bek-baraka” savdo majmuasi hududida 43 yoshli B.S. ismli ayol kiyim-kechak ulgurji savdosi bilan shug‘ullanayotgan vaqtida unga tegishli qo‘lbola usulda yasalgan savdo rastalarini uloqtirib, turli xil ayollar-kiyim-kechaklarini ochiqdan ochiq talon-toroj qilib ketib qolgan.
Tergovga qadar tekshiruv harakatlari davomida, I.N. va Y.N. ham “Bek-baraka” bozorida savdo ishlari bilan shug‘ullanishlari, B.S.ni savdo qilayotgan joyi ularga “tegishli” ekanligini, undan savdo joyi uchun kunlik pul berishini talab qilib, savdo qilishiga muntazam ravishda to‘sqinlik qilganliklari aniqlangan.
Mazkur holat yuzasidan Zangiota tumani IIB huzuridagi Tergov bo‘limi tomonidan I.N. va Y.N.ga nisbatan Jinoyat kodeksining 166-moddasi 2-qismi “v” bandi (talonchilik) bilan jinoyat ishi qo‘zg‘atilgan.
Jinoyat ishi doirasida jabrlanuvchiga yetkazilgan moddiy zarar miqdori aniqlanib, uni qoplash choralari ko‘rilishi ma’lum qilingan. Hozirda tergov harakatlari olib borilmoqda.
Bundan avval Toshkentdagi dorixonada janjal chiqarib, sotuvchining telefonini olib qochgan shaxs ushlangani, Nukusda bolalarning yolg‘iz qolganidan foydalanib, uyga aldov yo‘li bilan kirib, 25 mln so‘mlik tilla taqinchoqlarni o‘g‘irlab ketgan qo‘lga olingani hamda Andijonda 21 yoshli ayolning sochini zo‘rlik ishlatish yo‘li bilan qirqib tashlab, telefonini o‘marib ketgan yigit hibsga olingani haqida xabar berilgandi.
Izoh (0)