DXX Andijon viloyati boshqarmasi xodimlari Bosh prokuratura huzuridagi iqtisodiy jinoyatlarga qarshi kurashish Departamentining hududiy boshqarmasi bilan hamkorlikda yer sotish bilan bog‘liq bir nechta firibgarlik holatlariga chek qo‘ydi. Bu haqda DXX matbuot xizmatiga tayanib, “Xalq so‘zi online” ma’lum qildi.
Ta’kidlanishicha, viloyat hokimligi huzuridagi kichik sanoat zonalarini boshqarish direksiyasi xodimi 2 nafar sherigi bilan o‘zaro til biriktirib, mahalliy fuqaroga fermer xo‘jaligi tashkil qilishi uchun Xo‘jaobod tumani hokimiyatidagi mansabdor tanishlari orqali 100 gektar yer ajratib, tegishli hujjatlarni tayyorlatib berish evaziga undan 128 ming AQSh dollari olgan vaqtlarida ashyoviy dalillar bilan ushlandi.
Tergovoldi surishtiruv harakatlari davomida mazkur shaxslar o‘zlarining bu yordamlari uchun muqaddam avans sifatida 7 ming AQSh dollari olganliklari aniqlangan.
Shuningdek, olgan pullarining 70 ming AQSh dollarini Andijon viloyat Iqtisodiy taraqqiyot va kambag‘allikni qisqartirish bosh boshqarmasida ishlovchi tanishiga berishlari kerakligi ma’lum bo‘ldi va tezkor tadbir davom ettirilib, u ham pul olgan vaqtida ushlandi.
Hozirda ushbu shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilgan.
Bundan avval Olmazorda qariyb 36 mln so‘mlik tilla taqinchoqlarini o‘g‘irlatganini aytgan ayolning o‘zi bu ishni qilgani aniqlangani, Qashqadaryoda 14 yoshli qizning “boshini aylantirib”, otasiga tegishli 7,3 ming dollarni qo‘lga kiritgan yigit ushlangani hamda Samarqanddagi restoranda 1 mln so‘mga ovqatlanib, pul to‘lamasdan ketgan shaxsning telefon va pullarini olib qo‘ygan ofitsiantga nisbatan jinoiy ish qo‘zg‘atilgani haqida xabar berilgandi.
Izoh (0)