Namanganda 2021-yil 24—31-may kunlari xalqaro “Gullar festivali” bo‘lib o‘tadi. Bu haqda “Daryo” muxbiri Azizbek Abduvaliyev xabar bermoqda.
Oltmishinchi bor nishonlanayotgan bayramni yuqori saviyada o‘tkazish bo‘yicha joriy yil 10-aprel kuni Vazirlar Mahkamasining tegishli farmoyishi qabul qilindi. Bosh vazir Abdulla Aripov imzolagan hujjatda qayd etilishicha, festival o‘tadigan joylarda Qoraqalpog‘iston Respublikasi, viloyatlar va Toshkent shahriga alohida hududlar ajratiladi.
Tadbirga xorijiy davlatlardan mahoratli gulchilar, ekibana san’ati ustalari, landshaft dizaynerlari taklif etiladi.
Namangan shahrining asosiy ko‘chalarida gullar bilan bezatilgan 150 ta avtomobil ishtirokida bayram paradi o‘tkaziladi.
Zahiriddin Muhammad Bobur nomidagi madaniyat va istirohat bog‘i va uning atrofida gullar ko‘rgazmalari hamda sotuvi tashkil etiladi. Gulchilik san’atiga oid filmlar, kitoblar, albomlar va fotosuratlar namoyish etiladi.
Ma’lumot uchun, festival doirasida Namanganda jami 10 million dona gul ekilishi ko‘zda tutilgan. Birgina Namangan shahar obodonlashtirish boshqarmasi tomonidan shu kungacha 700 mingdan ortiq gul o‘tkazilgan.
Izoh (0)