Тошкент вилояти Зангиота туманидаги «Бек-барака» савдо мажмуасида сотувчини буюмларини талон-торож қилиб кетган аёллар қўлга олинди, дея хабар қилмоқда ИИВ матбуот хизмати.
Қайд этилишича, 2021 йилнинг 6 апрель куни соат 05:10 ларда 40 ёшли И.Н. ва 32 ёшли Ю.Н. исмли аёллар Зангиота туманида жойлашган «Бек-барака» савдо мажмуаси ҳудудида 43 ёшли Б.С. исмли аёл кийим-кечак улгуржи савдоси билан шуғулланаётган вақтида унга тегишли қўлбола усулда ясалган савдо расталарини улоқтириб, турли хил аёллар-кийим-кечакларини очиқдан очиқ талон-торож қилиб кетиб қолган.
Терговга қадар текширув ҳаракатлари давомида И.Н. ва Ю.Н. ҳам «Бек-барака» бозорида савдо ишлари билан шуғулланишлари, Б.С.ни савдо қилаётган жойи уларга «тегишли» эканлигини, ундан савдо жойи учун кунлик пул беришини талаб қилиб, савдо қилишига мунтазам равишда тўсқинлик қилганликлари аниқланган.
Мазкур ҳолат юзасидан Зангиота тумани ИИБ ҳузуридаги Тергов бўлими томонидан И.Н. ва Ю.Н.га нисбатан Жиноят кодексининг 166-моддаси 2-қисми «в» банди (талончилик) билан жиноят иши қўзғатилган.
Жиноят иши доирасида жабрланувчига етказилган моддий зарар миқдори аниқланиб, уни қоплаш чоралари кўрилиши маълум қилинган. Ҳозирда тергов ҳаракатлари олиб борилмоқда.
Бундан аввал Тошкентдаги дорихонада жанжал чиқариб, сотувчининг телефонини олиб қочган шахс ушлангани, Нукусда болаларнинг ёлғиз қолганидан фойдаланиб, уйга алдов йўли билан кириб, 25 млн сўмлик тилла тақинчоқларни ўғирлаб кетган қўлга олингани ҳамда Андижонда 21 ёшли аёлнинг сочини зўрлик ишлатиш йўли билан қирқиб ташлаб, телефонини ўмариб кетган йигит ҳибсга олингани ҳақида хабар берилганди.
Изоҳ (0)