Toshkent shahri Uchtepa tumanida ko‘p miqdorda qalbaki AQSh dollarini muomalaga kiritmoqchi bo‘lgan shaxs ushlandi, deya xabar qilmoqda Bosh prokuratura huzuridagi Departament matbuot xizmati.
Qayd etilishicha, Departamentning Uchtepa tuman bo‘limi tomonidan Milliy gvardiya xodimlari bilan hamkorlikda o‘tkazilgan tezkor tadbirda, fuqaro J.I. qalbaki valyutani muomalaga kiritish maqsadida, fuqaro R.dan Sigvey nomli vositani 50 AQSh dollariga sotib olgan vaqtda ashyoviy dalillar bilan ushlangan.
Shuningdek, fuqaro J.I. R.dan 58 quti Orbit saqichlarini sotib olishda qalbaki 6 300 AQSh dollarini berganligi aniqlanib, jami 6 350 qalbaki AQSh dollari ashyoviy dalil sifatida olingan.
Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Andijonda qalbaki dollarlar evaziga 9 ta iPhone 12 sotib olishga, Namanganda esa qalbaki pullarni bankka o‘tkazishga uringan shaxslar ushlangani, Farg‘onada 99 dona 100 ming so‘mlik qalbaki kupyurani sotgan shaxsga jinoyat ishi qo‘zg‘atilgani hamda Farg‘onada qalbaki 25 ming dollarni muomalaga kiritmoqchi bo‘lgan shaxslar qo‘lga olingani haqida xabar berilgandi.
Izoh (0)