Туркия коронавирус пандемиясининг энг қийин даврлардан бирини бошдан кечирмоқда. Бу ҳақда мамлакат соғлиқни сақлаш вазири Фахриддин Кожага таяниб, «РБК» хабар берди.
«Статистика ва жамиятда пасайиб бораётган психологик қаршиликни ҳисобга олган ҳолда, мамлакатимиз пандемиядаги энг қийин даврлардан бирини бошдан кечирмоқда, дейиш мумкин. Биз пандемиянинг янги чўққисидамиз», — деди вазир.
Вазир мамлакатнинг барча ҳудудларида касалланиш ўсиб бораётганини таъкидлади. Ҳукумат маълумотларига кўра, аҳолининг 80 фоизи инфекцияни юқтириш хавфи юқори бўлган шаҳарларда яшайди. 10 апрелга келиб мамлакатда COVID-19 билан касалланганларнинг умумий сони 3 миллион кишидан ошган. Мамлакатда суткалик юқтириш ҳолатлари 1 март куни қарийб 10 минг кишида қайд этилган бўлса, 7 апрелдан бошлаб бу кўрсаткич 50 минг кишидан пастга тушмаган. Сўнгги бир ҳафта ичида мамлакатда деярли 500 минг кишида коронавирус аниқланган.
Вазирнинг таъкидлашича, Туркияда интенсив терапия бўлимларида касалланганлар сони ҳали кескин ўсмаяпти, аммо статистика «ўсиш хавфидан огоҳлантирмоқда».
Туркия Соғлиқни сақлаш вазирлиги раҳбари вазиятни ёмонлаштираётган иккита асосий омилни санаб ўтди. Хусусан, аҳолининг вирусга қарши кураш пайтида кескинлик ва ноаниқликдан чарчагани ҳамда инфекциянинг мутацияларга учрагани. Кожанинг қўшимча қилишича, кўп ҳолларда Туркияда коронавируснинг «британча» штамми аниқланмоқда.
Шунингдек, вазир Туркиянинг 7,5 миллион аҳолиси коронавирусга қарши вакцинанинг ҳар иккала дозаси билан эмланганини таъкидлади. «Туркия дунё бўйлаб эмлаш суръати энг юқори бўлган олтинчи мамлакатдир», — деди Кожа. Унинг айтишича, мутахассислар ҳукуматга мавжуд вазият билан боғлиқ чекловларни киритиш таклифи билан чиқди.
Фахриддин Кожа Туркиядаги COVID-19 билан боғлиқ вазиятни баҳолаш учун мамлакатга Россия делегациясининг ташриф буюришини маълум қилди.
«Россия делегацияси тез орада Туркиянинг сайёҳлар орасида машҳур бўлган ҳудудларидаги коронавирусга қарши курашиш бўйича хавфсизлик чораларини баҳолаш учун келади», — деди Соғлиқни сақлаш вазирлиги раҳбари.
У бундай текширувдан сўнг Россия томонининг позицияси ўзгариши мумкинлигига умид билдирди. Аввалроқ Россия 15 апрелдан 1 июнгача Туркияга доимий ва чартер рейсларни тўхтатиши ҳақида эълон қилганди.
Туркия 2020 йилнинг март ойида COVID-19 туфайли ёпилганидан сўнг Россия Федерацияси мамлакат билан доимий парвозларни тиклашга рухсат берган биринчи давлатлардан бири бўлган. 1 августдан Анқара ва Истанбулга, 10 августдан Анталия, Бодрум ва Даламан курортларига парвоз учун рухсат берилганди.
«Роспотребнадзор» раҳбари Анна Попованинг таъкидлашича, Россияга четдан кириб келаётган коронавирус штаммларининг аксарияти Туркияга тўғри келмоқда.
Шунингдек, Россия билан бир қаторда Хитой ва бошқа мамлакатлар ҳам Туркия билан парвозларни тўхтатишга қарор қилди.
Хитойнинг фуқаро авиацияси маъмурияти (CААC) турк авиакомпанияларига 19 апрелдан бошлаб тўрт ҳафта давомида парвозларни тўхтатишга буйруқ берилганини эълон қилди.
Ўзбекистон Туркия билан парвозларни ҳали тўхтатмаган. Март ойининг охирида Самарқанд—Истанбул—Самарқанд йўналиши бўйича мунтазам рейслар тикланган эди.
Изоҳ (0)