O‘zbekiston va Rossiya samolyotsozlik sohasida qo‘shma loyihalarni amalga oshirish imkoniyatini muhokama qilmoqda. Bu haqda Toshkentda bo‘lib o‘tgan “Innoprom” xalqaro ko‘rgazma haftaligida ma’lum qilindi, deb yozadi “Podrobno”.
Gap birinchi navbatda Chkalov nomidagi Toshkent aviatsiya ishlab chiqarish birlashmasi haqida ketmoqda. Bu yerda sovet davrida “Il-76” samolyotlari, 2012-yilga qadar esa “Il-114-100” samolyotlari ishlab chiqarilgan.
“Hozirda ushbu zavod (“TAPOiCh” samolyotsozlik zavodi — tahr.) ishlamayapti. O‘ylaymanki, bu borada hamkorlikning mavjud yo‘nalishini topamiz”, — deydi “Rostex” davlat korporatsiyasi bosh direktori Sergey Chemezov.
Rossiya sanoat va savdo vaziri Denis Manturovning so‘zlariga ko‘ra, bugungi kunda Rossiyada samolyotsozlik yo‘nalishida o‘zbekistonlik talabalarni o‘qitish bo‘yicha maxsus dastur tayyorlanmoqda.
“Bu yiliga, taxminan, 100 nafar bakalavr degani”, — deydi u.
Ma’lumot uchun, Chkalov nomidagi Toshkent aviatsiya ishlab chiqarish birlashmasi 1941-yilda paydo bo‘lgan — urush boshlanishi bilan 1932-yilda Moskva yaqinidagi Ximki shahrida tashkil etilgan zavod Toshkentga evakuatsiya qilingan. Zavod so‘nggi samolyotlardan birini 2012-yilda ishlab chiqargan. Ayni paytda uning asosiy hududida Toshkent mexanika zavodi joylashgan.
Izoh (0)