O‘zbekiston Turizmni rivojlantirish davlat qo‘mitasining Hududiy bo‘linmalar faoliyatini muvofiqlashtirish boshqarmasi boshlig‘i o‘rinbosari Muhayyo Hayitova boshchiligidagi respublika ishchi guruhi Qarshi shahridagi yoqilg‘i quyish shoxobchalarining sanitar-gigeyenik holatini o‘rgandi. Bu haqda qo‘mita matbuot xizmati xabar qildi.
O‘rganishlar jarayonida Qarshi shahridan o‘tgan A-380 magistral yo‘li yoqasida joylashgan “Koinot gaz servis” MChJ hamda “Xudoyzod” mahallasidagi “Osiyo metan” MChJga qarashli avtomobillarga gaz quyish stansiyasi faoliyati vaqtincha to‘xtatildi.
Ta’kidlanishicha, tadbirkorlar Vazirlar Mahkamasining 2019-yil 21-sentabrdagi “Yo‘l va turizm infratuzilmasini yanada rivojlantirish chora-tadbirlari to‘g‘risida”gi 793-sonli qarori talablarini buzgan. Avvalgi o‘rganishlar davomida ko‘rsatib o‘tilgan kamchiliklar haligacha bartaraf etilmagan. Ushbu gaz quyish shoxobchalaridagi hojatxonalar belgilangan talablarga umuman javob bermaydi.
“Avtomobillarga gaz quyish stansiyalarining har ikkalasida ham nogironlar uchun pandus o‘rnatilmagan. Ichkariga kirsangiz, xonalar sassiqligidan nafasingiz qaytadi. Shamollatish tizimi ishlamaydi. Ona-bola xonasi jihozlanmagan. Hojatxonaning nogironlar uchun xonasi eshigi shu qadar tor qilinganki, undan aravacha kirishi amrimahol.
Eng qizig‘i, “Osiyo metan” MChJga qarashli avtomobillarga gaz quyish stansiyasi kanalizatsiyasi hojatxona yonidan o‘tgan zovurga chiqarilgan. Bu tashkilot rahbari va xodimlari uchun uyatli holat”, — deydi respublika ishchi guruhi rahbari.
Tadbirkorlar vaziyatni o‘nglagan holda ularga vaqtinchalik uzib qo‘yilgan gaz ta’minoti qayta tiklab berilishi tushuntirildi.
Bundan avval O‘zbekistonda 1-sentabrdan boshlab hojatxonasiz AYoQShlarga neft mahsulotlari va gaz yetkazib berish to‘xtatilishi haqida xabar berilgandi.
Izoh (0)