Ўзбекистон Туризмни ривожлантириш давлат қўмитасининг Ҳудудий бўлинмалар фаолиятини мувофиқлаштириш бошқармаси бошлиғи ўринбосари Муҳайё Ҳайитова бошчилигидаги республика ишчи гуруҳи Қарши шаҳридаги ёқилғи қуйиш шохобчаларининг санитар-гигееник ҳолатини ўрганди. Бу ҳақда қўмита матбуот хизмати хабар қилди.
Ўрганишлар жараёнида Қарши шаҳридан ўтган А-380 магистрал йўли ёқасида жойлашган «Коинот газ сервис» МЧЖ ҳамда «Худойзод» маҳалласидаги «Осиё метан» МЧЖга қарашли автомобилларга газ қуйиш станцияси фаолияти вақтинча тўхтатилди.
Таъкидланишича, тадбиркорлар Вазирлар Маҳкамасининг 2019 йил 21 сентябрдаги «Йўл ва туризм инфратузилмасини янада ривожлантириш чора-тадбирлари тўғрисида»ги 793-сонли қарори талабларини бузган. Аввалги ўрганишлар давомида кўрсатиб ўтилган камчиликлар ҳалигача бартараф этилмаган. Ушбу газ қуйиш шохобчаларидаги ҳожатхоналар белгиланган талабларга умуман жавоб бермайди.
«Автомобильларга газ қуйиш станцияларининг ҳар иккаласида ҳам ногиронлар учун пандус ўрнатилмаган. Ичкарига кирсангиз, хоналар сассиқлигидан нафасингиз қайтади. Шамоллатиш тизими ишламайди. Она-бола хонаси жиҳозланмаган. Ҳожатхонанинг ногиронлар учун хонаси эшиги шу қадар тор қилинганки, ундан аравача кириши амримаҳол.
Энг қизиғи, «Осиё метан» МЧЖга қарашли автомобилларга газ қуйиш станцияси канализацияси ҳожатхона ёнидан ўтган зовурга чиқарилган. Бу ташкилот раҳбари ва ходимлари учун уятли ҳолат», — дейди республика ишчи гуруҳи раҳбари.
Тадбиркорлар вазиятни ўнглаган ҳолда уларга вақтинчалик узиб қўйилган газ таъминоти қайта тиклаб берилиши тушунтирилди.
Бундан аввал Ўзбекистонда 1 сентябрдан бошлаб ҳожатхонасиз АЁҚШларга нефть маҳсулотлари ва газ етказиб бериш тўхтатилиши ҳақида хабар берилганди.
Изоҳ (0)