Bosh prokuratura marhum turkolog olim Andrey Kubatinga nisbatan DXX xodimlari tomonidan jismoniy yoki ruhiy tazyiq o‘tkazilmagan deb topdi.
Marhumning opasi Klara Saxarova O‘zbekiston Prezidentiga shikoyat yo‘llagan bo‘lib, u o‘z shikoyatida 2017-yil 25-martida Davlat xavfsizlik xizmati tomonidan ukasi Andrey Kubatinga nisbatan Jinoyat kodeksining 157-moddasi (davlatga xoinlik qilish) bilan jinoyat ishi qo‘zg‘atilib, dastlabki tergov davomida Kubatinga DXX xodimlari tomonidan ruhiy va jismoniy tazyiq o‘tkazilishi natijasida u o‘zi sodir qilmagan jinoyatiga iqror bo‘lganini qayd etgan.
Andrey Kubatin 2017-yil 1-dekabrda esa Respublika Harbiy sudi hukmiga asosan Jinoyat kodeksining 157-moddasi 1-qismida nazarda tutilgan jinoyatni sodir etganlikda aybli deb topilib, 11 yil muddatga ozodlikdan mahrum qilingan.
Shuningdek, shikoyatda Klara Saxarova Andrey Kubatin 2019-yil 26-sentabrda jinoyat ishlari bo‘yicha Toshkent viloyati sudi tomonidan oqlanib, ozodlikka chiqarilgani, 2020-yilda esa u koronavirus bilan kasallanib, 2020-yil 27-oktabr kuni vafot etganini ta’kidlab, ukasiga nisbatan tergov jarayonida ruhiy va jismoniy tazyiq o‘tkazgan DXX xodimlari harakatlariga qonuniy baho berishni so‘ragan.
Bosh prokuraturaning aniqlashicha, mazkur murojaat yuzasidan 2021-yil 9-fevral kuni DXX tergov boshqarmasi tomonidan ushbu tergov harakatlarida qatnashgan DXX xodimlari harakatlari qonuniyligini har tomonlama o‘rganib chiqish maqsadida tergovga qadar tekshiruv o‘tkazilgan.
Ish materialaridan ma’lum bo‘lishicha, Andrey Kubatin 2017-yilning 10-aprelidan 2017-yil 14-sentabrga qadar tergov hibsxonasida saqlangan.
“Hibsxonaga joylashtirish va chiqib ketayotgan vaqtida uning badanida jismoniy jarohatlar kuzatilmagan, u sog‘lig‘i bo‘yicha hech qanday shikoyat bilan murojaat qilmagan va uning sog‘lig‘i, ruhiy holati mutaxassislar tomonidan ijobiy baholangan”, — deyiladi xabarda.
Shuningdek, tergovga qadar tekshiruvda ushbu jinoyat ishi qonun doirasida o‘tkazilgani hamda fuqaroga huquq-tartibot idoralari xodimlari tomonidan hech qanday jismoniy yoki ruhiy tazyiq o‘tkazilmagani aniqlanib, natijasiga ko‘ra jinoyat ishini qo‘zg‘atishni rad qilish to‘g‘risida qaror qabul qilingan.
Ta’kidlanishicha, marhum Andrey Kubatinga nisbatan to‘plangan tergovga qadar tekshiruv materiallari O‘zbekiston Harbiy prokuraturasi tomonidan nazorat tartibida o‘rganilib, jinoyat ishini qo‘zg‘atishni rad qilish to‘g‘risida qarorni bekor qilish uchun asoslar topilmagan.
Avvarlroq marhum turkolog Andrey Kubatin qamoqda qattiq qiynoqlarga solingani hamda sud marhum olim Andrey Kubatinning oilasiga kompensatsiya undirish to‘g‘risidagi da’voni rad etgani haqida xabar berilgandi.
Izoh (0)