Sud marhum olim Andrey Kubatinning oilasiga kompensatsiya undirish to‘g‘risidagi da’voni rad etdi
Fuqarolik ishlari bo‘yicha Uchtepa tumanlararo sudi marhum turkolog Andrey Kubatinning opasi Klara Saxarovaning ukasiga yetkazilgan ma’naviy zarar uchun Toshkent shahar Moliya boshqarmasidan 3,5 milliard so‘m miqdorida kompensatsiya undirish to‘g‘risidagi da’vosini qondirmadi, deb xabar beradi “Kun.uz”
29-yanvar kuni bo‘lib o‘tgan sud majlisiga moliya boshqarmasidan vakil kelmagan. Sudya Hilola Ergasheva yig‘ilishni boshqa sanaga ko‘chirish taklifini bergan, biroq Klara Saxarova javobgar tomonsiz sudni davom ettirishga rozi bo‘lgan.
Sudya qaror qabul qilish uchun alohida xonaga kirib chiqqanidan so‘ng ish bo‘yicha hal qiluv qarorini e’lon qilgan. Unga ko‘ra, Klara Saxarovaning da’vo talablarini qanoatlantirish rad etilgan. Shuningdek, sudya protsess ishtirokchilariga nima sababdan bunday qarorga kelganiga to‘liq izoh berib o‘tgan.
Fuqarolik-protsessual kodeksning 17-moddasiga ko‘ra, fuqarolik huquqlari va majburiyatlariga ega bo‘lish qobiliyati barcha fuqarolar uchun teng ravishda tan olinadi. Fuqaroning huquqiy layoqati uning tug‘ilgan paytidayoq vujudga keladi va uning o‘limi bilan tugaydi, deydi u.
Meros ochilayotganda meros qoldiruvchiga tegishli bo‘lgan barcha huquq va majburiyatlar merosning bir qismidir va ularning mavjudligi uning o‘limi bilan tugamaydi. Biroq meros qoldiruvchining shaxsiyati bilan uzviy bog‘liq bo‘lgan huquq va majburiyatlar merosning bir qismi hisoblanmaydi. “Uning hayoti yoki sog‘lig‘iga yetkazilgan zararni qoplash huquqi ham shular jumlasidan”, — deya qo‘shimcha qiladi sudya.
“Ya’ni mazkur holatda ma’naviy zarar uchun kompensatsiyani faqat reabilitatsiyadan chiqqan shaxs olish huquqiga ega. Shu bilan birga, sud da’vogarga Jinoyat-protsessual kodeksining 304-moddasiga binoan reabilitatsiya qilingan shaxs vafot etgan taqdirda, ushbu moddaning 2-bandiga ko‘ra, tovon pulini — boquvchisini yo‘qotganlarning nafaqasi bilan ta’minlangan, uning oila a’zolari qatoriga kiradigan qarindoshlari olishi mumkinligini tushuntiradi”, — deydi sudya.
Klara Saxara sudning mazkur qarori bilan to‘xtab qolmasligini va murojaat qilishni davom ettirishini bildirgan. “Kerak bo‘lsa, O‘zbekistondagi barcha instansiyalarga boraman, undan keyin Yevropa sudiga materiallarni taqdim etaman”, — deydi Kubatinning opasi.
Eslatib o‘tamiz, Toshkent davlat sharqshunoslik institutining katta o‘qituvchisi bo‘lib ishlagan turkolog olim Andrey Kubatin 2017-yili Jinoyat kodeksining 157-moddasi (davlatga xoinlik qilish)da nazarda tutilgan jinoyatni sodir etishda ayblanib, hibsga olingan edi.
“Chet el olimiga noyob kitoblarning skaner qilingan nusxalarini topshirgani” haqidagi ayblov xulosasi bilan olimga nisbatan o‘sha yili 11 yilga ozodlikdan mahrum qilish jazosi tayinlandi, apellyatsiyadan so‘ng bu muddat 5 yilga tushirildi. Bu orada Xalqaro inson huquqlari tashkilotlari va Kubatinni tanigan dunyoning yirik olimlari bu ish uyushtirilganini aytib, Prezidentga murojaat qildi.
2019-yil 26-sentabr kuni jinoyat ishlari bo‘yicha Toshkent viloyati sudida Andrey Kubatinning ishi qayta ko‘rib chiqilgan va olim to‘liq oqlanib, sud zalidan ozod etilgandi.
2,5 yillik qamoqdan so‘ng Kubatin 2019-yil dekabrdan buyon O‘zbekiston Fanlar akademiyasi Milliy arxeologiya markazida faoliyat yuritib keldi.
2020-yil 29-oktabr kuni turkolog olim Andrey Kubatin koronavirusdan xastalanib, shifoxonada vafot etdi.
