Rossiya tomonidan ishlab chiqarilgan hayvonlar uchun mo‘ljallangan koronavirusga qarshi vaksina sinovlari O‘zbekistonda ham o‘tkazilishi rejalashtirilmoqda. Bu haqda “Xalq so‘zi Online” xabar qildi.
Qayd etilishicha, ayni paytda olimlar mazkur vaksina bilan emlangandan keyin hayvon tanasida koronavirusga qarshi immunitet qancha vaqt saqlanishini o‘rganmoqda. Mavjud ma’lumotlarga ko‘ra, uning eng kam muddati olti oy. Ommaviy ishlab chiqarish aprel oyi oxirlarida boshlanishi kutilmoqda.
Veterinariya va chorvachilikni rivojlantirish davlat qo‘mitasi mutaxassislari va qo‘mita huzuridagi Hayvon kasalliklari tashxisi va oziq-ovqat xavfsizligi davlat ilmiy markazi olimlari rossiyalik hamkasblari bilan mazkur vaksinaning sinov jarayonlarini O‘zbekistonda ham o‘tkazish bo‘yicha muzokaralar olib bormoqda.
Vaksinaning birinchi bosqich sinov jarayonlari yuqori samara bersa, ikkinchi bosqich sinov jarayonlari O‘zbekistonda ham o‘tkaziladi.
Vaksinani ommaviy ishlab chiqarish apreldayoq boshlanishi mumkin. Gretsiya, Polsha, Avstriya, AQSh, Kanada va Singapur kompaniyalari allaqachon doriga qiziqish bildirgan.
Vaksinaning klinik sinovlari 2020-yil oktabridan boshlab it, mushuk, shimol tulkisi, qorako‘zan, tulki va boshqa jonivorlarda o‘tkazilgan. Vaksina qabul qilgan hayvonlarda 100 foiz holatlarda koronavirusga nisbatan antitanalar hosil bo‘lgan.
Izoh (0)