Иқтисодчи олим, Ўзбекистон Фанлар академиясининг академиги Владимир Василевич Ким 8 апрелда 92 ёшида вафот этди. Бу ҳақда ЎзА хабар берди.
Олимнинг вафоти муносабати билан Президент Шавкат Мирзиёев, бош вазир Абдулла Арипов, Сенат раиси Танзила Норбоева, Олий Мажлис Қонунчилик палатаси спикери Нурдинжон Исмоилов, бош вазир Абдулла Арипов, Фанлар академияси президенти Беҳзод Йўлдошев ўз таъзияларини билдирди.
Маълумот учун, Владимир Ким 1929 йил 25 сентябрда Россиянинг Хабаровск ўлкасидаги Бикин шаҳрида туғилган. 1950 йилда Тошкент молия-иқтисод институти (ҳозирги Тошкент давлат иқтисодиёт университети)ни тамомлаган.
Ўз меҳнат фаолиятини Самарқанд туманида назорат-тафтишчи сифатида бошлаган, кейинчалик Тошкент молия-иқтисод институтининг аспирантурасида ўқиган. Дастлаб номзодлик, сўнгра докторлик диссертациясини ҳимоя қилган. Илм-фан соҳасидаги кўп йиллик самарали меҳнати туфайли 2000 йилда Ўзбекистон Фанлар академиясининг ҳақиқий аъзоси этиб сайланган.
Олимнинг қишлоқ хўжалиги иқтисодиёти соҳасининг назарий ва амалий масалаларига бағишланган 200 дан зиёд илмий мақолалари, 10 га яқин монографиялари Ўзбекистон ва чет эл олимлари ва мутахассислари томонидан ҳам эътироф этилган.
Аввалроқ Ўзбекистон ёшлар ташкилотининг собиқ раҳбари Дилшода Дадажонова 72 ёшида вафот этгани ҳақида хабар берилган эди. Ундан аввал Ўзбекистон Президентининг Фарғонадаги қабулхонаси раҳбари Ғуломжон Бобораҳимов 65 ёшида, шоира Гулчеҳра Нуруллаева 83 ёшида, академик Тўлқин Бекмуродов 85 ёшида вафот этгани маълум қилинганди.
Изоҳ (0)