Prezident Shavkat Mirziyoyevning matbuot kotibi Sherzod Asadov 9-aprel, juma kuni Milliy matbuot markazida o‘tkazilgan brifingda kelgusi haftada davlat rahbari ishtirok etadigan xalqaro tadbirlar haqida ma’lumot berdi, deya xabar qilmoqda “Daryo” muxbiri.
Ta’kidlanishicha, 13—14-aprel kunlari Yevropa xavfsizlik va hamkorlik tashkilotining amaldagi raisi, Shvetsiya tashqi ishlar vaziri Ann Kristin Lindening O‘zbekistonga tashrif buyurishi kutilmoqda. Linde xonim Shavkat Mirziyoyev tomonidan qabul qilinishi rejalashtirilgan.
“O‘zbekistonda YeXHTning vakolatxonasi 25 yildan ortiq vaqtdan buyon faoliyat ko‘rsatib kelayotgani ushbu nufuzli tashkilotning O‘zbekiston bilan dinamik va ochiq aloqalaridan dalolatdir. Ushbu sheriklik keyingi yillarda Prezident Shavkat Mirziyoyev rahbarligida amalga oshirilayotgan keng ko‘lamli islohotlar natijasida mutlaqo yangi darajaga ko‘tarildi.
Mamlakatimiz davlat va jamiyat hayotining barcha jabhalarida ko‘zlangan yangilanishlarni faol ilgari surishda ushbu muhim mintaqaviy tashkilot bilan hamkorlikni kengaytirishga qat’iy intiladi.
O‘zbekiston bilan Shvetsiya o‘rtasida barcha sohalarda konstruktiv muloqot va o‘zaro manfaatli munosabatlar mustahkamlanib kelmoqda. Bu aloqalar, ayniqsa, so‘nggi yillarda faollashib, 2020-yil noyabrda va 2021-yil fevralda siyosiy mashalahatlashuvlar o‘tkazildi. Ann Kristin Lindening tashrifi mamlakatlarimiz o‘rtasidagi hamkorlikni yangi bosqichga ko‘taradi”, — dedi Asadov.
Mavzuga doir:
- Sherzod Asadov mazkur haftada Shavkat Mirziyoyev qatnashadigan xalqaro tadbirlar haqida ma’lumot berdi
- “Tanqidiy xabarlar javobsiz qolyapti” — Prezident matbuot kotibi
- YeXHT: O‘zbekistonda 2019-yili o‘tkazilgan parlament saylovlari haqiqiy raqobatni namoyish etmadi
- Yevropa xavfsizlik va hamkorlik tashkiloti O‘zbekistondagi mahkumlarga insonparvarlik yordamini yubordi
Izoh (0)