“O‘zbekkino” agentligi O‘zbekiston kinematografiya agentligiga aylandi

O‘zbekiston Prezidentining “Kino san’ati va kino sanoatini sifat jihatidan yangi bosqichga ko‘tarish va sohani davlat tomonidan qo‘llab-quvvatlash tizimini yanada takomillashtirish chora-tadbirlari to‘g‘risida”gi farmoni bilan “O‘zbekkino” milliy agentligi O‘zbekiston Kinematografiya agentligi etib qayta nomlandi, deb xabar beradi O‘zA.

Farmon bilan “Ipak yo‘li durdonasi” Toshkent xalqaro kinofestivali ta’sis etildi hamda u 2021-yildan muntazam o‘tkazib boriladi.

Shuningdek, kino san’ati va sanoati vakillarining mualliflik huquqlarini jamoaviy asosda boshqaradigan O‘zbekiston kino sanoati vakillari uyushmasi nodavlat notijorat tashkiloti tashkil etiladi, OTMlarning kinematografiya yo‘nalishida ta’lim olayotgan talabalarini qo‘llab-quvvatlash uchun Xudoybergan Devonov nomidagi davlat stipendiyasi ta’sis etiladi.

Bundan tashqari, “Oltin Humo” milliy kino mukofoti taqdimoti har yili an’anaviy ravishda o‘tkazib boriladi.

Farmon bilan milliy kinematografiya sohasida samarali ishlaydigan ijodiy ishchilar va mutaxassislarni rag‘batlantirish maqsadida “Kinematografiya fidokori” ko‘krak nishoni ta’sis etiladi. Shuningdek, Milliy kinematografiyani rivojlantirish markazi nodavlat notijorat tashkiloti tashkil etildi.

Milliy seriallar ishlab chiqarishni qo‘llab-quvvatlash va rivojlantirish uchun respublika miqyosida faoliyat yurituvchi telekanallarga agentlik tomonidan har yili 12 milliard so‘mdan kam bo‘lmagan miqdorda subsidiya mablag‘lari ajratiladi.

Bundan tashqari, markaz hujjatli va xronikal filmlar ishlab chiqarishni ochiq tanlov asosida tashkil etadi.

Quyidagilar markazning asosiy vazifalari hisoblanadi:

• milliy film va seriallar ishlab chiqarishni hamda hamkorlikda kinomahsulotlar yaratishni moliyaviy qo‘llab-quvvatlash;
• davlat buyurtmasi asosida ishlab chiqarilgan filmlar prokatini bozor tamoyillari asosida tashkil etish;
• mahalliy va xorijiy investorlarni milliy filmlarni ishlab chiqarish, prokatga berish va namoyish etishni moliyalashtirishga jalb qilish;
• milliy filmlarni xorijiy tillarga hamda jahonning eng sara kino asarlarini davlat tiliga subtitrlashtirish va dublyaj qilishni moliyalashtirish;
• milliy kino san’ati asarlarining xalqaro kinofestivallarda ishtirok etishini ta’minlash hamda mahalliy va xalqaro kinotadbirlarni tashkillashtirish;
• O‘zbekiston kinoarboblari ijodiy uyushmasi hamda faoliyat yo‘nalishi kino san’ati va sanoati vakillarining huquqlarini himoya qilish bo‘lgan nodavlat notijorat tashkilotlarini grant va ijtimoiy buyurtmalar orqali qo‘llab-quvvatlash.

“Kinematografiya sohasida davlat boshqaruvi tizimini takomillashtirish hamda soha vakillarining ijodiy faoliyati uchun munosib sharoit yaratish to‘g‘risida”gi Prezident qaroriga ko‘ra, O‘zbekiston Kinematografiya agentligi huzurida O‘zbekiston Kinematografiya akademiyasi oliy ta’lim muassasasi, “O‘zbekiston milliy kinofondi” davlat muassasasi, “O‘zbekfilm” kinokonserni” DUK hamda agentlikning viloyatlar va Toshkent shahar hududiy bo‘limlari tashkil etiladi.

Shu bilan birga, “Multiplikatsion filmlar studiyasi” DUK, “Respublika kinoprokat markazi” DUK va uning hududiy filiallari, “Kinematografchilar uyi” DUK; hamda “Kinoindustriya sohasi xodimlarini qayta tayyorlash va ularning malakasini oshirish markazi” DUK faoliyati tugatiladi. “Yoshlar ijodiy tajriba studiyasi” DUK “Yoshlik” kinostudiyasi” DUK etib qayta nomlandi.

Eslatib o‘tamiz, O‘zbekiston Prezidenti 2020-yil 20-noyabr kuni “O‘zbekfilm” kinostudiyasining zamonaviy qiyofa kasb etgan yangi binosi va uning faoliyati bilan yaqindan tanishgan edi. Shuningdek, Shavkat Mirziyoyev kinematografiya vakillari bilan uchrashuvda o‘zbek kinosini yanada rivojlantirishga taalluqli o‘zining bir qator taklif va fikrlarini ham bildirgandi.