Sirdaryo viloyatining Shirin shaharidagi “Mirzo Ulug‘bek” mahalla fuqarolar yig‘inida yashovchi Adham Aliyev va Zilola Ravshanova xonadonida uch nafar egizak farzand dunyoga keldi. Bu haqda Sirdaryo viloyat sog‘liqni saqlash boshqarmasi axborot xizmatiga tayanib, “Xalq so‘zi Online” xabar berdi.
Ta’kidlanishicha, ona 21-fevral kuni, homiladorlikni 27-haftasida muddatdan oldingi tug‘ruq xavfi tashxisi bilan viloyat perinatal markazining homiladorlar patologiyasi bo‘limiga yotqizilib, chaqaloqlar tug‘ilgunga qadar nazoratda ushlab turilgan. Onaga oliy toifali akusher-genekolog Ruqiya Oqmirzayeva tomonidan malakali tibbiy xizmat ko‘rsatilib, davolash muolajalari o‘tkazilgan. Olib borilgan davolash muolajalariga qaramay, muddatidan oldingi tug‘ruq sodir bo‘lgan.
Chaqaloqlarga Muhammad, Abdulloh, Sulaymon deb ism qo‘yilgan. Muhammad 1600 gramm, Abdulloh 1854 gramm, Sulaymon 1570 gramm vazn bilan tug‘ilgan.
Ularga oliy toifali neonatologlar tomonidan davo muolajalari o‘tkazilgan, sog‘ligi, o‘sishi va rivojlanishi bilan bog‘liq muammolar to‘liq bartaraf etilgach, onaning uyiga chaqaloqlar bilan qaytish uchun ruxsat berilgan.
Avvalroq Shofirkonda tug‘ilgan uch egizakka Mirziyo, Miromon va Saida ismlari qo‘yilgani, Sog‘liqni saqlash vazirligi Termizda olti nafar egizak tug‘ilgani to‘g‘risidagi xabarni rad etgani, andijonlik ayol to‘rt egizakni dunyoga keltirgani to‘g‘risida xabar berilgandi.
Izoh (0)